«Lenındi qaıtaryńdar!»: ShQO-da qırap qalǵan eskertkish mańyna jazý jazǵan adam izdestirilýde

ÓSKEMEN. QazAqparat – Shyǵys Qazaqstan oblysy Altaı qalasynda Lenın eskertkishiniń mańyna jazý jazyp ketken adamdy polıtsııa izdestirýde, dep habarlaıdy QazAqparat tilshisi.

Tamyz aıynyń ortasynda Altaı qalasynda jóndelip jatqan Lenın eskertkishi qırap qalǵan bolatyn. Osyǵan baılanysty polıtsııanyń tergeý júrgizip jatqany habarlanǵan.

Kesheli beri áleýmettik jelide belgisiz bireýdiń Lenın eskertkishi turǵan qorshaýdyń syrtyna «Lenındi qaıtaryńdar!» dep jazǵan jazýynyń fotosýreti tarady.

Osy rette, ShQO Polıtsııa departamenti vandaldyń izdestirilip jatqanyn habarlady.

«4 qyrkúıek kúni belgisiz adamnyń Lenın eskertkishin qalpyna keltirý jumystary júrgizilip jatqan qorshaýǵa qyzyl boıaýmen jazba túsirgeni týraly habar kelip tústi. Qazirgi ýaqytta onyń kim ekenin anyqtaý sharalary júrgizilýde. QR ÁQBtK-niń 434-baby (usaq buzaqylyq úshin, ıaǵnı qoǵamdyq oryndarda balaǵat sózder aıtqany, jeke tulǵalardy qorlap qorlaǵany, ǵımarattardy, ózge de qurylystardy, turǵyn úı-jaılardy, ortaq paıdalaný oryndaryn, kóliktegi jáne ózge de qoǵamdyq oryndardaǵy múlikti qorlaǵany jáne basqalardy qurmettemeýdi bildiretin basqa da osyndaı áreketter úshin, qoǵamdyq tártipti jáne jeke tulǵalardyń tynyshtyǵyn buzatyn adamdar) boıynsha ákimshilik is qozǵaldy», - delingen aqparatta.

Atalǵan bap boıynsha kináli adam 20 AEK mólsherinde (69 myń teńge) aıyppul tólep nemese besten on bes táýlikke deıingi merzimge ákimshilik qamaqqa alynýy múmkin.