Lenın, Chapaev: SQO-da 350-ge jýyq aýyl-kóshe ataýy aýystyrýdy qajet etedi
PETROPAVL. KAZINFORM – Soltústik Qazaqstan oblysynda ıdeologııalyq turǵyda eskirgen 350-ge jýyq aýyl-kóshe ataýy aýystyrýdy qajet etedi.

SQO mádenıet, tilderdi damytý jáne arhıv isi basqarmasy ótken jyldy qorytyndylap, 2025 jylǵa jospardy bekitti.
Vedomstvo basshysy Sanat Áýbákirovtiń aıtýynsha, oblysta ataýy aýystyrylýy tıis 33 eldi meken, 14 aýyldyq okrýg jáne 300 kóshe bar. Eskirgen ataýlardan qutylý úshin 2025 jylǵa arnalǵan Jol kartasy ázirlengen.
— Bıyl 4 aýyldyq okrýgtiń, 4 eldi mekenniń jáne 128 kósheniń ataýyn ózgertý usynyldy. Sondaı-aq «Birlik» shaǵyn aýdanynda — 28, «Orman» shaǵyn aýdanynda 7 jańa kóshege respýblıkalyq onomastıkalyq komıssııa bekitken «dástúrli ataýlar», «jer-sý ataýlary» tiziminen alyndy, - deıdi Sanat Áýbákirov.
«Tarıhı tulǵalar» respýblıkalyq tiziliminde 697 esim, sonyń ishinde 39-y — SQO-dan bar. Oblystyq onomastıkalyq komıssııa qaraýyna eldi meken men kóshe ataýlaryn aýystyrýǵa qatysty — 9, 4 nysanǵa jáne 4 mektepke ataý berý jóninde usynys túsken.
— Petropavldaǵy № 28 orta bilim beretin mektepke Qanysh Sátpaevtyń, Jambyl aýdany Blagoveşenka orta mektebine Marat Kenjegýzınniń, Shal aqyn aýdany Semıpolka orta mektebine Ekinshi dúnıejúzilik soǵys ardageri Pavel Gonchardyń, Tımırıazev aýdany Aqsýat orta mektebine Nurjan Qalıasqarovtyń esimin berý jóninde usynys bar. Jeńistiń 80 jyldyǵyna oraı Mádenıet jáne aqparat mınıstrliginen soǵys batyrlarynyń esimderin kóshe jáne bilim ordalaryna berý týraly tapsyrma tústi. Aýdandarǵa tıisti hat jiberildi, usynys aıdyń ortasyna deıin túsýi kerek, - deıdi basqarma basshysy.
Buǵan deıin SQO bıyl 3 144 qonys aýdarýshyny qabyldaıtynyn jazǵan edik.