Leńgirdiń sý júıesine 4,5 mlrd teńge jumsalsa da turǵyndar laı sý iship otyr

ShYMKENT. QazAqparat - Ońtústik Qazaqstan oblysyna qarasty Leńgir qalasynyń turǵyndary kóp jyldardan beri tirshilik nárinen tarshylyq kórip keledi. Qalany qubyr sýymen qamtý úshin bes jyl buryn 4,5 mlrd teńge bólingen. Alaıda mundaǵy jurt áli kúnge laı sý iship otyr, dep habarlaıdy QazAqparat HAA tilshisi.

Tóle bı aýdany ortalyǵyndaǵy sý qubyrynyń qurylysy 2012 jyly bastalǵan. Oǵan memlekettik bıýdjetten 4,5 mlrd teńge bólindi. Jumysty memlekettik satyp alý boıynsha «Shymkentmontaj» mekemesi júrgizgen. Alaıda, atqarylǵan jumys sapasyz bolyp shyqqan. Muny jergilikti halyq rastap otyr.

«Myna sýdy tundyryp ishpese, jaramaıdy. Ony birneshe ydysqa quıyp, tundyryp ishemiz. Osy qurylystyń sapasy syn kótermeıtini týraly men depýtattyq saýal jibergenmin. Sóıte tura, biz shyryldaǵanyzben, ákim-qaralar oǵan qulaq ta asqan joq», - deıdi Tóle bı aýdanynyń qurmetti azamaty Ǵabdýlın Elýbaev.

Osydan eki jyl buryn bitýi tıisti qurylys jumysy áli kúnge sozylyp keledi. Tipti quqyq qorǵaý organdary  qurylystyń kemshilikterine qatysty qylmystyq is te qozǵaǵan. Biraq, nátıjesiz. Saldarynan bitpegen isten bir kemshilik kún saıyn tabylýda eken.

«Merdiger mekemege bir aı merzim berildi. Kemshilikterdiń bárin joıý týraly. Merdiger mekemeniń dırektory bul máseleni bir aı kóleminde joıýǵa ýáde berip otyr. Eger berilmegen jaǵdaıda taǵy quqyqqorǵaý organdaryna beriledi», - deıdi Tóle bı aýdany ákiminiń orynbasary Masterhan Pernebekov.