Leńgirde jolǵa talasqan mas júrgizýshi jedel járdem qyzmetkerimen tóbelesti

TÚRKІSTAN. QazAqparat - Túrkistan oblysynda jedel járdem qyzmetkerlerimen jolǵa talasyp, tóbelesken turǵyn jaýapkershilikke tartyldy, dep habarlaıdy QazAqparat tilshisi.

Áleýmettik jelide jedel járdem qyzmetkerlerimen jol boıynda janjaldasyp, tóbelesken turǵynnyń vıdeosy tarady.

Onda qolynda syrasy bar kólik júrgizýshisi jedel járdem qyzmetkerin urǵany anyq kórinedi.

Al, shaqyrtý boıynsha jetken tártip saqshysy eshqandaı shara qoldanbaı, kúdiktiniń oqıǵa ornyn tastap ketýine jol bergen.

Atalǵan oqıǵa Tólebı aýdanyna qarasty Leńgir qalasynda bolǵan.

«Polıtsııa qyzmetkerleri zańǵa qaıshy áreketti toqtatty. «Volkswagen Passat» kóliginiń júrgizýshisi medıtsınalyq kýálandyrýǵa jetkizilip, onyń «jeńil dárejeli» mas bolǵany rastaldy. Buzaqylyq áreketteri men dene jaraqatyn salý faktisi boıynsha QR QK 293-baby 1-bóligimen sotqa deıingi tergeý amaldary bastalǵan. Tergeý barysynda jedel járdem júrgizýshisi eshqandaı shaǵymy joq ekeni týraly qarsy aryz túsirgen. 25 maýsymda taraptardyń tatýlasýyna baılanysty qylmystyq is QR QPK 35-baby 1-bóligi jáne 68-baby 1-bóligine sáıkes toqtatyldy» - delingen Túrkistan oblysy polıtsııa departamentiniń baspasóz qyzmeti taratqan aqparatta.

Sondaı-aq, «Volkswagen Passat» júrgizýshisine QR ÁQBtK-niń 608-baby (mas kúıinde kólik basqarý) men QR ÁQBtK 590-baby 4-bóligi (jalǵan nómiri bar avtokólikti basqarý) boıynsha ákimshilik hattama toltyrylyp, kólik aıypturaqqa qoıyldy.

Al, beınejazbadaǵy shaqyrtý boıynsha kelgen polıtseıge qatysty qyzmettik tergeý júrgiziletin boldy.