«Leksýs Qazaqstan» kompanııasy gıbrıdti jetegi bar jańa avtokólikter jelisin iske qospaq
ALMATY. 25 mamyr. QazAqparat /Ádilet Musahaev/ - Búgin Almatyda resmı qyzmet etkenine bir jyl tolǵan «Leksýs Qazaqstan» kompanııasy ótken jyldy qorytyndylap, gıbrıdti jetegi bar avtokólikter jelisin iske qosqandyqtaryn málim etti.
2010 jyl Qazaqstandaǵy Lexus úshin tabysty bolǵan. Osy jyldyń qorytyndysy boıynsha Lexus resmı premıým naryqta 28 paıyzdyq úlespen kóshbasshylyqty ıelengen. Byltyr mejelengen jospar 10%-ǵa artyq oryndalyp, satylym 219 birlikti quraǵan. Bul qazaqstandyq tutynýshylardyń Lexus markasyna degen qyzyǵýshylyǵynyń artqandyn kórsetedi.
Bıylǵy jyl da Qazaqstanda Lexus úshin jemisti bastalǵan. Resmı premıým naryqtyń 73% quraıtyn orasan ósimge qaramastan, Lexus óz ustanymyn nyǵaıtyp, naryqta 45% úleske ıe bolyp, satylym nátıjesi 143 birlikti quraǵan.
«Qorshaǵan ortany qorǵaýda jáne jańa avtokólik qurastyrý tehnologııalaryn damytýda kóshbasshy bola otyryp, biz qashan da qyzmetimizdiń ónim ázirleý, óndiris, logıstıka, satý, satýdan keıin qyzmet kórsetý, kólikterdi iske jaratý sekildi barlyq kezeńderinde qorshaǵan ortaǵa keri yqpaldy azaıtýǵa talpynamyz», -deıdi «Leksýs Qazaqstannyń» prezıdenti Shıngo Kato.
Sonymen qatar ol biz úshin ozyq tehnologııa - gıbrıdti jetekti damytý mańyzdy qadamdardyń biri bolyp tabylady dep málim etti. «Gıbrıdti jetek 21 ǵasyrdaǵy negizgi tehnologııa bolyp tabylady. Sondyqtan osy jańa tehnologııany Qazaqstanda zor yqylaspen tanystyrýdamyn», -dep atap ótti óz sózinde Shıngo Kato.
