Leh Kachınskı mingen ushaqtyń apatyna aýa raıy sebep bolǵan
ASTANA. Mamyrdyń 5-i. QazAqparat - Polıaktyń áskerı meteorologtary sáýirdiń 10-ynda Smolensk aýdanynda jergilikti ýaqyt saǵat 8.25-tegi nashar aýa raıy týraly estigen, biraq birneshe mınýttan keıin apatqa ushyraǵan Tý-154M prezıdenttik ushaǵynyń ekıpajyn ol týraly eskertpegen, dep habarlaıdy RBK agenttigi.
«Polıaktyń áskerı meteorologtary Smolensk áýejaıyndaǵy jaısyz aýa raıy týraly saǵat 8.25-te estip bilgen. Biraq ol jaıynda prezıdenttik TÝ-154M ushaǵynyń ekıpajyna habarlamaǵan», dep jazady «Rech Pospolıta» basylymy.
«Bortynda 96 adam bolǵan prezıdenttik laınerdiń ushqyshtary Smolenskidegi aýa raıy týraly sońǵy málimetti Varshavadaǵy Okenche áskerı áýejaıynan ushardyń aldynda, tańǵy saǵat 7.27-de alǵan. Biraq ol tańǵy saǵat 5.00-tegi aýa raıy týraly málimet bolǵan jáne keıinnen anyqtalǵandaı, eskirip ketken málimet bolǵan», dep jazady basylym.
Barlyq 96 adam, onyń ishinde Polsha Prezıdenti Leh Kachınskı de qaza bolǵan Tý-154-M prezıdenttik ushaǵy apatynyń basqa dolbarlary ázirge rastalǵan joq. Atap aıtqanda, Memleketaralyq avıatsııalyq komıtet mamandary polıak mamandarymen birlesip júrgizilgen zertteýler men konsýltatsııalardyń qorytyndysy boıynsha ushaq tehnıkasynyń jumysynda eshqandaı kinárat bolmaǵanyn aıtyp otyr, dep habarlaıdy «RIA «Novostı» agenttigi komıtetke silteme jasap.
Ushaqtyń «qara jáshikterin» oqý jónindegi jumys toby zertteý jumystaryn jalǵastyrýda. Injenerlik-tehnıkalyq kishi komıssııa jumysynyń nátıjesi polıak sarapshylarymen talqylandy. Ushý kezindegi tehnıkanyń jumysynda eshqandaı aqaý bolmaǵan», - delingen habarlamada.
