LEGO Star Wars serııasynda «aqyldy» jınaǵyn tanystyrdy
ASTANA. KAZINFORM — LEGO Group kompanııasy Star Wars serııasyndaǵy jańa jınaqtarda alǵash ret qoldanylatyn «aqyldy» elementti usyndy. Jańa ázirleme CES 2026 tehnologııalyq kórmesinde Las-Vegasta tanystyryldy, dep habarlaıdy Euronews.
Tanystyrylym barysynda danııalyq óndirýshi 2×4 formatyndaǵy elementtiń múmkindikterin kórsetti. Onyń ishine arnaıy baǵdarlamalyq kod ornatylǵan. Jańa element jaryq shashyp, dybys shyǵara alady jáne konstrýktordyń basqa bólshekterimen ózara árekettesedi.
Demonstratsııa kezinde «aqyldy» element LEGO úırekshesiniń músinine bekitilgende, ol qańqyldaǵan dybys shyǵarǵan. Al basqa bir mysalda kólik astyna túsken keıipkerge qosylǵan kezde narazylyq bildirgen dybys estilgen. Sonymen qatar element jalǵanǵan bólshektiń túsin anyqtap, dál sol túske jaryq beredi.
LEGO Group kompanııasynyń aǵa vıtse-prezıdenti Tom Donaldsonnyń aıtýynsha, árbir mundaı element kez kelgen fýnktsııany atqara alady.
— Árbir kodtalǵan belgi men árbir «aqyldy» element kez kelgen rólge ıe bola alady. Balalar bólshekterdi erkin úılestirip, óz álemderin jasaıdy. Mınıfıgýralardyń ózinde de kod bar, olardyń ózindik sıpaty bar jáne árqaısysy biregeı, — dedi ol.
Onyń aıtýynsha, jańalyqtyń basty ereksheligi — shaǵyn ólshem, sensorlar men ıntellektýaldyq múmkindikterdiń bir platforma retinde jumys isteýi. LEGO josparyna sáıkes, balalar bul elementti júzdegen túrli tásilmen qoldana alady.
Kompanııa ókilderi qurylǵy jańa symsyz júıe arqyly ońaı qýattalatynyn atap ótti. Qýattaý qurylǵysy júıemen birge satylady. Naryqta 70 jyldan astam ýaqyttan beri jumys istep kele jatqan LEGO bul jańalyqty klassıkalyq konstrýktordyń jańa damý kezeńi retinde baǵalap otyr.
«Aqyldy» elementteri bar alǵashqy jınaqtar Star Wars jelisindegi LEGO Star Wars toptamasy aıasynda naýryz aıynda satylymǵa shyǵady. Alaıda olardyń baǵasy standartty jınaqtarǵa qaraǵanda joǵary bolady.
Atap aıtqanda, «Dart Veıderdiń TIE joıǵyshy» jınaǵyna 473 bólshek, Dart Veıderdiń ınteraktıvti mınıfıgýrasy, bir «aqyldy» element jáne bir kodtalǵan belgi kiredi. Baǵasy — shamamen 70 eýro.
Al X-Wing Red Five Lıýk jınaǵynda 584 bólshek, eki ınteraktıvti mınıfıgýra, bir «aqyldy» element jáne bes kodtalǵan belgi bar. Jıyntyqtyń baǵasy — shamamen 100 eýro.
Aıta keteıik, LEGO kıiz úı konstrýktoryn shyǵarýy múmkin.