Lego óńdelgen plastıkten oıynshyq jasaý josparynan bas tartty
Danııalyq Lego kompanııasy eki jyldyq synaqtan keıin oıynshyqtaryn qaıta óńdelgen plastıkten jasaý josparynan bas tartqany týraly jarııalady, dep habarlaıdy QazAqparat Euronews aqparat agenttigine silteme jasap.
Álemde oıynshyq shyǵaratyn eń iri kompanııanyń málimdeýinshe, ol PET - polıetılentereftalattan jasalǵan qaıta óńdelgen plastık bótelkelerden túrli-tústi kishkene kirpishterdi shyǵarýdy jalǵastyrýdan bas tartqan.
Eki jyl buryn munaı negizindegi plastıkten jasalǵan konstrýktor oıynshyqtaryn shyǵarýshy kompanııa qaıta óńdelgen kezde sapasy nasharlamaıtyn PET plastıkten jasalyp qaıta óńdelgen bótelkelerge kóshý múmkindigin zertteı bastady.
Synaq qorytyndysy boıynsha «bul materıaldyń kómirqyshqyl gazynyń shyǵaryndylaryn azaıtpaıtyny anyqtaldy».
Degenmen, kompanııa 2032 jylǵa deıingi merzimdi belgileı otyryp, Lego konstrýktory úshin ekologııalyq taza materıaldardy satyp alýǵa daıyn ekenin málimdedi.
Kompanııa ókilderiniń aıtýynsha, Lego 2032 jylǵa qaraı ekologııalyq taza materıaldarǵa kóshý jáne kómirqyshqyl gaz shyǵaryndylaryn 37%-ǵa azaıtý jónindegi kúsh-jigerdiń bóligi retinde turaqtylyq bastamalaryna 1,2 mlrd AQSh dollarynan astam ınvestıtsııa salǵan.
Lego kompanııasyn 1932 jyly Ole Kırk Krıstıansen qurǵan. Bul ataý eki dat sózinen shyqqan - leg jáne godt, olardy biriktirgende «jaqsy oınaý» degen maǵynany bildiredi. Saýda belgisin jasaýshylar «lego» latyn tilinen aýdarǵanda «men qurastyramyn» degen maǵynany bildiretinin múldem bilmegenin aıtty.
