Lego kompanııasy óz tarıhyndaǵy eń úlken konstrýktor jınaǵyn tanystyrdy
ASTANA. KAZINFORM – Lego kompanııasy óz tarıhyndaǵy eń aýqymdy konstrýktor jınaǵyn tanystyrdy. Jańa rekord ıegeri Barselonadaǵy áıgili Sagrada Famılııa soborynyń úlgisi boldy. Konstrýktor 12 060 bólshekten turady, dep habarlaıdy BILD basylymy.
Basylymnyń jazýynsha, jańa jınaq bólshekter sany boıynsha 2021 jyly shyqqan Lego Art World Map jıyntyǵyn basyp ozdy. Aıyrmashylyq 365 bólshekti quraıdy.
Qurastyrylǵan úlginiń bıiktigi 62 santımetrge, al eni 47 santımetrge jetedi. Konstrýktor shynaıy sobordyń qurylys kezeńderin – krıpta men Týǵan kún fasadynan bastap munaralary men basty qasbetine deıingi bólikterin beıneleıdi.
Stonewars mamandandyrylǵan basylymynyń baǵalaýynsha, jıyntyqty tolyq qurastyrýǵa 25-35 saǵat ýaqyt ketýi múmkin.
Jańa ónimge aldyn ala tapsyrys berý Lego kompanııasynyń ınternet-dúkeninde bastalyp ketti. Jetkizý 2026 jylǵy 1 qarashada bastalady. Jınaqtyń baǵasy — 749 eýro.
Jobanyń dızaıneri Rok Jgalın Kobe komanda ataqty katalon sáýletshisi Antonı Gaýdıdiń ıdeıasyn barynsha dál jetkizýge tyrysqanyn aıtty.
– Bul Lego tarıhyndaǵy eń úlken jıyntyq qana emes, sonymen qatar álemdegi eń aýqymdy sáýlet týyndylarynyń biriniń úlgisi, – dedi ol.
Sagrada Famılııa Barselonanyń basty kórikti oryndarynyń biri ári álemdegi eń tanymal uzaq qurylystardyń qataryna jatady. Ǵıbadathananyń qurylysy 140 jyldan astam ýaqyttan beri jalǵasyp keledi.
Buǵan deıin Lego kompanııasy 2026 jylǵy álem chempıonatyna oraı Lıonel Messı, Krıshtıaný Ronaldý jáne Kılıan Mbappege arnalǵan fýtbol taqyrybyndaǵy jańa jıyntyqtardy shyǵaratyny habarlandy.
