LEGO kıiz úı konstrýktoryn shyǵarýy múmkin
ASTANA. KAZINFORM — Qazaqstandyq arýdyń ıdeıasy halyqaralyq baıqaýdyń fınalyna shyqty.
Joba kıiz úıdiń qurylymyn konstrýktor túrinde tanytýdy kózdeıdi.
Bul týraly Aınur Bolat Jibek Joly arnasynyń «Búgin LIVE» baǵdarlamasynda habarlady.
— Sheteldik kompanııalarmen jumys isteý barysynda tek Louis Vuitton emes, basqa da sheteldik brendtermen kelisý múmkin ekenine kózim jetti. Bastapqyda inilerimmen sóıleskende olardyń kıiz úı týraly, onyń qurylymy jaıly kóp bile bermeıtinin túsindim. Qalanyń balalary bolǵandyqtan, olar úshin kıiz úı — daıyn kúıinde ákelip, qoıa salatyn zat sekildi. Sol kıiz úıdiń árbir bóligin bilsin degen nıetpen aǵashtan konstrýktor jasaı bastadym. Biraq inilerim oǵan da asa qyzyqpady. Sondyqtan ıdeıamdy LEGO formatyna aınaldyrsam degen oı týdy, — deıdi Aınur Bolat.
LEGO kompanııasynyń resmı saıtynda álemniń túkpir-túkpirinen kelgen kreatorlar óz jobalaryn usyna alady. Eger joba barlyq kezeńnen súrinbeı ótip, fınalda 10 myń daýys jınasa, LEGO ony óndirip, dúnıe júzi boıynsha resmı dúkenderinde satylymǵa shyǵarady.
— Men fınalǵa deıin jettim. Qazir 6 myń daýystan asty. Al men ıdeıa avtory retinde tirkelemin, — deıdi startaper.
Joba Nomad Yurt dep atalady. Aınur Bolat LEGO arqyly balalardyń qazaq mádenıetine degen qyzyǵýshylyǵyn arttyrǵysy keletinin jetkizdi.
— Bul joba arqyly balalar kıiz úıdiń qalaı qurylatynyn, onyń bólshekteriniń mańyzyn oıyn túrinde úırenedi. Sol arqyly dástúrimizdi jańa býynǵa jeńil ári zamanaýı ádispen jetkizgim keledi, — deıdi ol.
Daýys berý úshin LEGO-nyń resmı saıtyna kirý kerek.
— Daýys berý tegin. Biraq tek 16 jastan asqan azamattar qatysa alady. Eger fınalda 10 myńnan astam daýys jınasam, LEGO-nyń kıiz úı úlgisindegi konstrýktory álemdik naryqqa shyǵady, — deıdi Aınur Bolat.
Aıta keteıik, buǵan deıin startaper Aınur Bolattyń jobasyna Louis Vuitton qyzyǵýshylyq tanytqanyn jazǵan edik.