«Lego: Fılm» úshinshi ret soltústikamerıkandyq prokatta úzdik shyqty
ASTANA. QazAqparat - «Lego: Fılm» mýltfılmi Soltústik Amerıkadaǵy kınoprokatta úshinshi ret úzdik bolyp, 21-23 aqpandaǵy demalys kúnderinde 31,5 mln dollar jınady. Bul týraly Reuters egenttigi habarlady.
Aıta keteıik, 7 aqpanda bastalǵan kórsetilimnen beri «Lego: Fılm» soltústikamerıkandyq kınoteatrlardan 183,2 mln dollar jınady. Qazaqstanda mýltfılm 27 aqpannan kórsetile bastaıdy. Onda qarapaıym lego-oıynshyq barlyq lego-álemdi bir jerge jınap, jabystyryp tastaýdy maqsat etken zulym lego-dıktatorǵa qarsy turady. Warner Bros kompanııasy týyndynyń jalǵasyn túsirýge qazirden kirisip ketken kórinedi.
«Lego: Fılmnen» keıingi orynǵa Kevın Kostner túsken tyńshylyq trıller «Kisi óltirýge 3 kún» fılmi taban tiredi (3 Days to Kill). Kartına AQSh pen Kanadada alǵashqy demalysta 12,3 mıllıon dollar jınady.
Úshinshi orynǵa ejelgi Rım tarıhynan syr shertetin «Pompeı» fılmi turaqtap, 10 mln dollar jınady. 1987 jyly shyqqan ataqty «Robokoptyń» rımeıki tórtinshi orynǵa syrǵyp qaldy, onyń jınaǵany 9,4 mln dollar. Al Djordj Klýnıdiń «Jádigershil jigitter» fılmi úzdik bestikti tuıyqtap, ótken demalystarda 8,1 mln. dollar jınady.
