Legıonerlerge tólenetin qyrýar qarajatty balalar sportyna jumsaǵan áldeqaıda tıimdi - M. Tinikeev
ASTANA. QazAqparat - Legıonerlerge tólengen qarajatty balalar sportyn damytýǵa jumsaǵan áldeqaıda tıimdi bolar edi. Búgin Májilistegi Úkimet saǵatynda depýtat Muhtar Tinikeev osyndaı pikir bildirdi. Aıta keteıik, Úkimet saǵatynda buqaralyq sport jáne dene shynyqtyrý salasyn damytý máseleleri talqylanǵan bolatyn.
«Keshe Semeıde Qazaqstan chempıonaty aıaqtaldy, oǵan 350-ge tarta qazaqstandyq sportshy qatysty. Oǵan deıin bir apta buryn Qaraǵandyda «Nomad MMA» chempıonaty da ótken bolatyn. Osynyń bárine bir tıyn da memlekettik qoldaý bolǵan joq. Al endi basqa sport túrlerin qarap kóreıikshi: máselen, Arshavınge mıllıon dollardan astam jalaqy tólengeli otyr. Jylyna mıllıon dollardan asady. Aıyna 30 myń dollar alatyn legıonerler bar. Al bizge osyndaı fýtbol kerek pe? Bul qarajat nege balalar sportyna joldanbaıdy», - dedi depýtat M. Tinikeev.
Sonymen qatar, ol kil legıonerden turatyn «Barys» hokkeı klýbyn da synǵa aldy. «Onda bir ǵana qazaq - Dámir Ryspaev oınaıdy, onda da alańǵa tek tóbeles úshin shyǵyp júr. 2012-2013 jylǵy maýsymǵa qarasaq, eki hokkeıshiniń jalaqysy 1 mıllıon 300 myńnan 1 mıllıon 800 myń dollarǵa deıin. Tórt hokkeıshiniń jalaqysy 900 myń dollardan 1 mıllıon 300 myń dollarǵa deıin. Bizge osy kerek pe?»- dedi depýtat.
