Legıonerlerge bıýdjetten qarjy bólinbeıdi: zań kúshine endi
ASTANA. KAZINFORM — Búgin Prezıdent Qasym-Jomart Toqaev 2025 jylǵy 15 sáýirde qol qoıǵan «QR keıbir zańnamalyq aktilerine dene shynyqtyrý jáne sport, sondaı-aq artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zań kúshine endi.
Týrızm jáne sport mınıstrliginiń habarlaýynsha, jańa zań sport salasyn jańǵyrtýǵa, sport saıasatynyń tıimdiligin arttyrýǵa jáne bıýdjet qarajatyn ońtaıly paıdalanýǵa baǵyttalǵan.
Komandalyq sport túrlerindegi klýbtardy ustaýǵa arnalǵan bıýdjet lımıti aılyq eseptik kórsetkishke (AEK) baılanysty bekitildi. Bul ınflıatsııany eskerýge múmkindik beredi jáne jyl saıyn qarjylandyrý kólemin qysqartýǵa jol bermeıdi.
— Búginde basym baǵyt retinde 60-tan astam sport túri aıqyndaldy. Olardyń shamamen 30-y elimizdiń árbir óńirinde damıdy. Onyń ishine Olımpıada, Paralımpıada, Sýrdlımpıada, Azııa jáne Para Azııa oıyndary baǵdarlamasyna engen, sondaı-aq ulttyq sport túrleri kiredi. Sondaı-aq sport federatsııalarynyń mártebesi naqtylandy, ıaǵnı respýblıkalyq jáne óńirlik birlestikter ulttyq akkredıttelgen federatsııalar deńgeıine aýystyryldy. Akkredıtatsııanyń mindetti sharty retinde, jergilikti federatsııalardyń ulttyq quramǵa músheligi bekitildi, — delingen habarlamada.
Odan ári vedomstvo taratqan aqparatta І toptaǵy múgedektigi bar sportshylardyń súıemeldeýshileri zańmen qorǵalǵany aıtylǵan. Olar sportshyǵa kıim aýystyrý, arbany almastyrý, medıtsınalyq tekserýden ótý jáne ózge de jaǵdaıda kómek kórsetedi. Bul norma jattyǵý barysy men jarystarǵa qatysý jaǵdaıyn jaqsartýǵa baǵyttalǵan.
Odan bólek, jańa zańda sport uıymdary basshylaryn 5 jyldyq merzimmen rotatsııalaý júıesi engizildi. Eger belgili bir aýdanda jalǵyz sport qurylymy bolsa, rotatsııa sol oblys aýmaǵyndaǵy kórshiles aýdan nemese qala arasynda júzege asyrylady.
— Atalǵan ózgerister qazirgi jaǵdaıdy jan-jaqty taldaý negizinde qabyldandy. Elimizde 180-nen astam sport túri damysa da, halyqaralyq arenalarda turaqty nátıje kórsetetin nebári 14 jazǵy jáne 5 qysqy olımpıadalyq sport túri bar. Qarjylyq shyǵyndardyń ósýi, nátıjeniń tómendeýi jáne júıeli tásildiń bolmaýy zańnamalyq reformanyń qajettigin týǵyzdy, — deıdi mınıstrlikten.
Búginde Týrızm jáne sport mınıstrligi zańǵa engizilgen túzetýlerdi iske asyrýǵa kiristi.
Eske salaıyq, bıyl 15 sáýirde Prezıdent legıonerlerdi bıýdjetten qarjylandyrýǵa tyıym salatyn zańǵa qol qoıdy.