Legıonerlerge bıýdjetten qarjy bólinbeıdi — Májilis zań qabyldady
ASTANA. KAZINFORM — Jańa zańda legıonerlerge memleket bıýdjetinen de kvazımemlekettik sektordyń bıýdjeti esebinen de qarjy bólýge tyıym salatyn norma bar.
Májilis Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq normalardyń artyq (shamadan tys) zańnamalyq reglamenttelýin bolǵyzbaý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańyn ekinshi oqylymda qabyldady.
— Mınıstrlik buryn bekitip jibergen, atynyń ózin aǵaıyn bilmeıtin sport túrlerin qazyna qarjysynan qaǵý úshin naqty sheshim qabyldandy. Zańǵa joǵary jetistikter sporty degen túsinik endi, salaǵa bólingen memlekettiń qarjysy endi solarǵa baǵyttalady. Joǵary jetistikter sportyna, ıaǵnı olımpıada, paralımpıada, sýrdlımpıada, Azııa, para Azııa jáne ulttyq sport túrleri kiredi. Buryn mınıstrlik 180-nen astam sport túrin tirkep qoıyp onyń barlyǵyna qarjy berip kelgen bolsa endi olardyń sany 3 ese qysqarady. Joǵary jetistikter sportynyń ishinde joǵary jetistik kórsetkenderi úshin basym sport túrleri degen túsinik engizilip, onyń basymdyqtary da aıqyn kórsetildi, — dedi Nartaı Sársenǵalıev Májilistiń jalpy otyrysynda atalǵan zańdy tanystyra otyryp.
Halyq qalaýlysynyń aıtýynsha, jańa zańda legıonerlerge memleket bıýdjetinen de kvazımemlekettik sektordyń bıýdjeti esebinen de qarjy bólýge tyıym salatyn norma bar.
Málimdeýinshe, endi bıýdjet qarajaty joǵary jetistikter sporty men basym sport túrlerine, memlekettik uıymdardyń jumys isteýine, buqaralyq sportqa jáne sporttyq ınfraqurylymdy damytýǵa baǵyttalady.
— Federatsııalardyń akkredıtıatsııa alý tetigi ózgertildi. Sáıkesinshe endi elimizdegi barlyq sporttyq federatsııa ulttyq sport federatsııasy bolýy kerek. Osylaısha 1 sport túri boıynsha 1 ulttyq sport federatsııa ǵana akkredıtteledi. Sonymen qatar zań jobasynda Týrızm jáne sport mınıstrliginiń jekelegen quzyretinen artyq zańnamalyq reglamentteý normalaryn alyp tastaý kózdeledi. Týrızm, dene shynyqtyrý jáne sport salasyndaǵy qyzmetti memlekettik retteýdiń negizgi qaǵıdattary, maqsattary men mindetteri naqtylandy, — deıdi depýtat.
Zań jobasyna taǵy birqatar túzetý engizildi:
— basym sport túrleriniń qataryna ulttyq sport túrleri engizildi;
— akkredıttelgen jergilikti sport federatsııalarynyń akkredıttelgen ulttyq sport federatsııasynyń múshesi bolý mindeti belgilendi;
— akkredıttelgen ulttyq jáne jergilikti sport federatsııalaryna dinı ekstremızm men terrorızmniń aldyn alýǵa baǵyttalǵan sharalar qabyldaý mindeti bekitildi;
— «memlekettik dene shynyqtyrý — sport uıymdarynyń birinshi basshylaryn rotatsııalaý» uǵymy engizildi, sondaı-aq memlekettik dene shynyqtyrý-sport uıymdarynyń birinshi basshylaryn rotatsııalaý ınstıtýty engizildi;
— salanyń ereksheligin eskere otyryp, birinshi basshylardy memlekettik dene shynyqtyrý-sport uıymdaryna laýazymdy qyzmetke taǵaıyndaý men qyzmetinen bosatý tártibin reglamentteý boıynsha quzyretter belgilendi;
— ýákilettti organǵa sporttaǵy daryndy balalarǵa arnalǵan mamandandyrylǵan mektep-ınternattarǵa-kolledjderge oqýǵa qabyldaýdyń úlgilik qaǵıdalaryn bekitý boıynsha quzyret berildi;
— birinshi toptaǵy múgedektigi bar sportshyny alyp júretin adamnyń sporttyq is-sharalarǵa barýǵa baılanysty shyǵyndaryn óteý boıynsha zańnamalyq talap belgilendi;
— sportpen shuǵyldaný jáne sporttyq jarystarǵa qatysý úshin eń tómengi jasty bekitý jónindegi normalar qabyldandy;
— dene shynyqtyrý jáne sport salasyndaǵy ýákiletti organǵa basym sport túrleriniń respýblıkalyq tizbesin jáne basym sport túrleriniń óńirlik tizbesin ázirleý jáne bekitý, oǵan qosa joǵary jetistikter sporty túrleriniń tizbesin, sondaı-aq olardy bıýdjet qarajaty esebinen qarjylandyrý tártibin aıqyndaý boıynsha quzyret berildi;
— dene shynyqtyrý jáne sport sýbektileri, sondaı-aq dene shynyqtyrý jáne sport salasyndaǵy memlekettik mekemeler usynatyn aqyly qyzmetterdiń tizbesi naqtylandy;
— sporttyq medıtsınany damytýǵa, sportshylardy daıarlaý standarttaryn ázirleý men bekitýge baǵyttalǵan normalar qarastyrylǵan.
Aıta keteıik, Májilis depýtaty Nartaı Sársenǵalıev buǵan deıin otandyq sportty damytýǵa bólinetin qyrýar qarjyǵa alańdatýshylyq tanytyp, ashyq esep júrgizýdi talap etken edi.