Legıonerlerdi bıýdjet esebinen qarjylandyrýdy toqtatqaly 8 mlrd teńge únemdeldi
ASTANA. KAZINFORM — Astanada sport salasyndaǵy reformalardyń alǵashqy nátıjesi qorytyndylandy. 8 mlrd teńgeden astam bıýdjet qarajaty únemdelip, balalar sportyna bólinetin qarjy eki esege jýyq artqan. Sonymen qatar sport mektepterindegi jattyqtyrýshy-oqytýshylardyń jalaqysy 30%-ǵa ósti. Bul týraly Týrızm jáne sport mınıstrligi málim etti.
Astanada Sport kúni qarsańynda «Qazaqstandaǵy sport — reformalardan nátıjege deıin. Dene shynyqtyrý jáne sport týraly jańa zańdy iske asyrý qorytyndylary» atty sport konferentsııasy ótip jatyr. Plenarlyq sessııalarda saladaǵy aýqymdy reformalardyń alǵashqy nátıjeleri talqylandy.
Memleket basshysynyń tapsyrmalaryn oryndaý maqsatynda Týrızm jáne sport mınıstrligi ázirlegen jańa zań salany júıeli jańǵyrtýdyń negizgi tetigine aınaldy. Reforma aıasynda memleket qarjylandyrýdyń neǵurlym ashyq modeline kóship, qarajattyń tıimsiz jumsalýyn azaıtty, sondaı-aq sport rezervi men basym baǵyttardy qoldaýdy kúsheıtti.
Qazirdiń ózinde reformalardyń naqty nátıjeleri bar:
- 8 mlrd teńgeden astam bıýdjet qarajaty únemdeldi. Buǵan kásibı klýbtardy qarjylandyrýǵa lımıt engizý jáne legıonerlerdi bıýdjet esebinen qarjylandyrýdan bas tartý yqpal etti;
- balalar sportyna bólinetin qarjy eki esege jýyq artty. Sport mektepterindegi bir tárbıelenýshige arnalǵan jyldyq qarjylandyrý 233 myń teńgeden 415 myń teńgege deıin ulǵaıtyldy;
- jattyqtyrýshylardyń jalaqysy 30%-ǵa ósti. Sport mektepteriniń jattyqtyrýshy-oqytýshylarynyń eńbekaqysyn kezeń-kezeńimen arttyrý bastaldy. Qazirgi tańda 3 511 jattyqtyrýshy-oqytýshy tıisti testileýge qatysqan.
— Búginde biz sportshylar men sport salasynyń ókilderi retinde reformalardyń jaı ǵana qujat emes ekenin is júzinde kórip otyrmyz. Mınıstrliktiń atqarǵan jumysy — bizdiń salaǵa uzaq ýaqyt boıy jetispeı kelgen ózgerister. Bul ózgerister qazirdiń ózinde nátıje berip jatyr. Onyń naqty kórinisi — sportshylarymyzdyń jeńisteri, — dedi «Sportshylar keńesi» atqarý komıtetiniń tóraǵasy, kúresten Olımpıada chempıony ıÝrıı Melnıchenko.
Sessııa barysynda sport uıymdaryn basqarý júıesindegi ózgerister de atap ótildi. 2025 jylǵy qyrkúıekten bastap basshylardy rotatsııalaýdyń biryńǵaı tártibi engizildi. Al sport uıymdarynyń birinshi basshylaryn taǵaıyndaý ashyq konkýrstyq negizde júzege asyrylady.
Vedomstvonyń málimetinshe, búgingi tańda 112 taǵaıyndaýdyń 86-sy nemese 76%-y konkýrs nátıjesinde júzege asyrylǵan. Qazaqstan sport salasyndaǵy reformalardyń naqty nátıjesin kóre bastady. Bıýdjet qarajatyn paıdalaný tıimdiligi artyp, sportshylar men jattyqtyrýshylardy qoldaý kúsheıtilmek. Sonymen qatar sport rezervin daıarlaý júıesi jetildirilip, salany basqarý tıimdiligi artyp, sportqa jeke ınvestıtsııa tartýǵa qolaıly jaǵdaı qalyptasyp keledi.
Aıta keteıik, byltyr maýsym aıynda legıonerlerge bıýdjetten qarjy bólinbeıtini týraly zań kúshine engen bolatyn.
