Legıonerler ketip jatyr: «Ertis» hokkeı klýbyn qarjylandyrý qysqartyldy
PAVLODAR. QazAqparat – Pavlodar oblysynyń «Ertis» hokkeı klýbynda ońtaılandyrý jumystary júrgizilýde, dep habarlaıdy QazAqparat Pavlodarnews.kz saıtyna silteme jasap.
Pavlodar oblysynyń Týrızmdi jáne sportty damytý jónindegi basqarmasy basshysynyń orynbasary Nurlan Esembaev ońtaılandyrý barlyq kásibı sport klýbtarynda júrip jatqanyn atap ótti. Bundaı klýbtarǵa bólinetin qarjy qysqartylyp, ol aqsha buqaralyq sportty damytýǵa baǵyttalady.
«Ertis» hokkeı klýbyn jabý týraly másele kóterilgen joq. Tek legıonerler komandadan ketip jatyr. Olardyń ornyn jastar quramynda júrgen oıynshylar tolyqtyrady. Al, olardyń ornyn sport mektebinde júrgen balalar basady», - dedi Nurlan Esembaev.
2021 jylǵa hokkeıdi damytý úshin «Ertis» hokkeı klýbynyń negizgi jáne jastar quramyna 270 mln teńgeden astam qarjy bólindi. Sondaı-aq balalar hokkeıine, olardyń jarystarǵa qatysýyna 60 mln teńgeden artyq qarjy qarastyryldy. Qazirgi ýaqytta demeýshiler tarapynan qarjy tabý kózdelýde.
«Ertis» hokkeı klýbynyń dırektory Jumabaı Ahmýtınov komandaǵa maýsym basynda júktelgen tapsyrma sol kúıinde qalatynyn aıtty.
«Bizdiń jastar alǵash ret negizgi komandaǵa tartylyp jatqan joq. Burynnan jarystarǵa qatysyp júr. Sondyqtan kúres jalǵasady. Oblystyq ákimdik demeýshi izdep jatyr. Kelesi maýsymdy demeýshimen bastaımyz degen oıdamyn. Ótken maýsymda demeýshi bolǵan joq. Komandaǵa aýyr boldy», - dedi Jumabaı Ahmýtınov.
Klýb dırektorynyń sózinshe, ótken maýsymda hokkeıshilerdiń ortasha jalaqysy 400-450 myń teńgeni quraǵan.
Aıta keteıik, «Ertis» hokkeı klýby 2012-2013, 2013-2014, 2014-2015 jyldary Qazaqstan chempıony atanǵan. Birneshe márte el birinshiliginde kúmis jáne qol júldeger boldy.
