Legıoner sportshylardyń Qazaqstanǵa medaldan basqa paıdalary da shash etekten - E. Qojaǵapanov

Toqtala ketetin jaıt, jıyn barysynda depýtat Maıra Aısına elimizdegi sport klýbtaryna shaqyrylatyn legıonerler máselesin kótergen bolatyn. «Sheteldik sportshylardy elge shaqyryp, olarǵa qyrýar qarajat shyǵyndaý kópshilik arasynda narazylyq týdyrmaı qoımaıdy. Bulardyń el sportyndaǵy róli qandaı? Ondaı máseleni retteý úshin qandaı sharalar qabyldanýda?» - dep suraǵan bolatyn M. Aısına.

Óz kezeginde Sport jáne dene shynyqtyrý agenttiginiń tóraǵasy Erlan Qojaǵapanov shetelden legıoner shaqyrý el sportyndaǵy úlken tájirıbege aınalǵanyn jasyrmady. «Degenmen, damyǵan memleketterdiń qaı-qaısysynda da bul úrdis bar. Máselen, AQSh jeńil atletter úshin Afrıka qurlyǵynan keletin sportshylarǵa qushaq ashady. Frantsııa da, Reseı de legıonerlerdi belsendi tartyp otyr. Reseıdiń ózinde Sochı olımpıadasyna AQSh, Koreıa, Japon azamattaryn óz qatarynan shyǵýǵa tartyp otyr. Bizde de legıonerler barshylyq. Alaıda, olardyń Qazaqstanǵa medaldardan basqa paıdalary da shash etekten», - deıdi agenttik basshysy.

Onyń aıtýynsha, Maıa Maneza, Zýlfııa Chınshanlo, Svetlana Podobedovalardyń jeńisterinen keıin Qazaqstanda qyz balalardyń aýyr atletıkaǵa qyzyǵýshylyǵy kúrt artqan. «Máselen, Jazıra Japarkúl, Nadejda Noǵaı, Anna Nurmuhamedovalar aýyr atletıkadan bıikke kóterile bastady. Sondyqtan da, legıonerlerdiń ózi bizdiń ulttyq quramaǵa otandyq sportshylardyń kelýine kóp sep bolady ári olardyń izin sol qazaqstandyq sportshylar basýda», - dedi E. Qojaǵapanov.

Sonymen qatar, agenttik tóraǵasy Sochıda ótetin álemdik dodaǵa qazaqstan atynan birde-bir legıoner barmaıtynyn da alǵa tartty. «Degenmen, komandalyq sportta legıonerler shaqyrtý bar. Alaıda aldaǵy ýaqytta oblystyq komandalarda sheteldik legıonerler sanyn azaıtýdy qarastyryp otyrmyz», - dedi ol.