Lebıaji aýdanynda órt sóndirýshiler ormandaǵy qyzyl jalynmen arpalysýda - Pavlodar
ASTANA. QazAqparat - Lebıaji aýdany Sharbaqty aýyldyq okrýgine qarasty Jabaǵyly aýylynda órt sóndirýshiler ormandaǵy qyzyl jalynmen arpalysýda.
Oblystyq TJD málimetinshe, ázirge qansha aýmaq órtengeni belgisiz, dep habarlaıdypavlodarnews.kz.
Oqıǵa ornynda toǵyz avtotsısterna, bes traktor, 50 ormanshy jumys isteýde. Tilsiz jaýdy aýyzdyqtaýǵa Shyǵys Qazaqstan oblysynan ormanshylar shyqqan. Sebebi qatty jel saldarynan órt sol jaqqa aýysyp ketýi múmkin. Sondaı-aq Lebıaji aýdany órt sóndirý bóliminen bir tehnıka men úsh adam jumyldyrylǵan. Jergilikti turǵyndarǵa qaýip joq.
«Qazirgi tańda Jabaǵyly aýylyna arnaıy tehnıka men avtobýstar jiberildi. Bizdiń órt sóndirýshiler men bes tehnıka kúzette tur. Jel batystan shyǵysqa qaraı soǵýda. Eger de jaǵdaı qıyndasa, turǵyndar kórshiles Tós-Aǵash aýylyna kóshirilýi múmkin. Órt saǵat tórttiń kezinde Malybaı aýyldyq okrýginde qyrda bastalǵan», - deıdi Lebıaji aýdanynyń ákimi Ernur Áıtkenov.
