Іle jaǵalaýyndaǵy Kóshpendiler qalasynyń qazirgi jaı-kúıi qalaı
QONAEV. KAZINFORM — Almaty oblysyndaǵy erekshe oryndardyń biri — oblys ortalyǵynan 30 shaqyrym qashyqta ornalasqan Kóshpendiler qalasy.
Іle ózeniniń boıynda fılm túsirilimine arnap salynǵan qalashyqqa arada jıyrma jyldan astam ýaqyt ótse de týrıster jıi keledi.
Sebebi bul nysan naqty tarıhı shahar bolmasa da, qazaq halqynyń ortaǵasyrdaǵy tynys-tirshiligin kózben kórip, qolmen ustap kórýge, sezinýge múmkindik beretin biregeı kınodekoratsııa.
Ol 2004 jyly «Kóshpendiler» fılmin túsirý úshin XVIII ǵasyrdaǵy bekinis retinde arnaıy salynǵan. Keshen 5,8 gektar jerdi alyp jatyr.
Qurylys barynsha shynaıy kóringenimen negizinen aǵashtan jáne betine balshyq jaǵylǵan penoplast sııaqty materıaldardan jasalǵan. Qalashyqtyń ishinde zyndan, han ordasy, meshit, qolóner sheberhanalary men bazar alańy bar.
Osy jyldar ishinde nysan kóptegen otandyq jáne sheteldik jobalardyń túsiriliminde qoldanyldy. Onyń ishinde «Dnevnoı dozor» fılmi men tanymal ánshi Jah Khalib-tiń «Medına» beınebaıany bar.
Sondaı-aq keshen shańyraq kótergeli jatqan jastar arasynda tanymal. Munda Love Story túsirý úshin elimizdiń túkpir-túkpirinen keletin erli-zaıyptylar az emes.
Degenmen, 20 jyldan astam ýaqyt ishinde qalashyq tozyp, jaı-kúıi nasharlaǵan. Bir qabyrǵasy qulap, ne arasynda jaryqtary paıda bolǵan qurylymdar az emes.
Nysandy óz kózimen kórgen Kazinform tilshisi osylaı baǵa berdi.
2025 jyldyń tamyz aıynda Sh. Aımanov atyndaǵy «Qazaqfılm» kınostýdııasy Kóshpendiler qalashyǵyn Qonaev qalasyna syıǵa tartty. Endi qala ákimdigi tozyp, eskirgen qalashyqty jańǵyrtyp, ony týrıster úshin tartymdy orynǵa aınaldyrǵaly otyr.
Onyń alǵashqy qadamy da jasaldy. Byltyr qurylysy bastalǵan týrıstik nysanǵa deıingi 6,9 shaqyrymdyq jol qoldanysqa berildi. Endi Almaty men Qonaev qalasynan Kóshpendiler qalasyna baratyn jol týrıster úshin jeńildeıdi.
— Bul keshenge qazir jańadan jol salynyp, onyń boıy jaryqtandyryldy. Munda keletin týrıster aǵynyn kóbeıtý maqsatynda nysandy tolyq jóndeý júrgizý josparlanyp otyr. Týrıster úshin barlyq jaǵdaı jasalady, — dedi Alatau vızıt ortalyǵynyń ókili Farıza Sıhymbaeva.
Eske salaıyq, buǵan deıin elimizdiń qaı óńirlerinde jańa týrıstik vızıt-ortalyqtar ashylatynyn jazǵanbyz.
