Іle aýdanynyń ákimi memleketti 204 mln teńge shyǵynǵa batyrdy - Antıkor

ASTANA. KAZINFORM – Antıkor Іle aýdanynyń burynǵy ákimine qarjy jymqyrý kúdiginen bólek, laýazymdyq ókilettigin asyra paıdalandy degen aıyp taǵyp otyr. Іstiń mán-jaıyn Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov aıtyp berdi.

«Sybaılas jemqorlyqqa qarsy is-qımyl agenttiginiń Almaty oblysy boıynsha ókildigi oblys prokýratýrasymen birlesip Іle aýdany ákiminiń birqatar jemqorlyq qylmystaryn áshkereledi. Ol órt qaýipsizdigi talaptaryn buza otyryp, sanıtarlyq-epıdemıologııalyq baqylaý organdarynyń ruqsatynsyz affılıırlengen kompanııaǵa qatty turmystyq qaldyqtar polıgonyn senimgerlik basqarýǵa berý kúdigine ilindi», - dedi Danııar Bıgaıdarov agenttikte ótken baspasóz máslıhatynda.

Odan bólek, ákimge laýazymdyq ókilettigin asyra paıdalandy degen kúdik keltirilip otyr.

«Qylmystyq áreketke aýdandyq qarjy jáne turǵyn úı-kommýnaldyq sharýashylyq bólimderiniń basshylary da tartylǵan. Aıta ketý kerek, kompanııanyń qatty turmystyq qaldyqtardy kádege jaratý boıynsha shartta kózdelgen mindettemeleri oryndalmaǵan, al onyń qyzmetinen túsken tabysty ákim jeke ózine paıdalanǵan. Óńir ekologııasyna quqyqqa qaıshy áreketterdiń saldarynan 204 mln teńge kóleminde zalal keltirildi», - dep tolyqtyrdy resmı ókil.

Sottyń sanktsııasymen kúdikti qamaýǵa alyndy, tergeý amaldary jalǵasyp jatyr.

Eske sala ketsek, bıyl 4 qyrkúıekte Almaty oblysy Іle aýdanynyń ákimi Baǵdat Qarasaev qamaýǵa alyndy.

Keıin Almaty oblysynyń prokýratýrasy Іle aýdanynyń ákiminiń ustalýyna qatysty túsinik berdi.