Іle-Alataýynyń kórikti jerleri álemdik úzdikter qatarynda – mınıstrlik
ASTANA. KAZINFORM -Qazaqstannyń tabıǵı jáne týrıstik nysandary halyqaralyq deńgeıde taǵy bir márte moıyndaldy, dep habarlady búgin QR Ekologııa jáne tabıǵı resýrstar mınıstrliginiń baspasóz qyzmeti.
Baspasóz qyzmetiniń málimetterine qaraǵanda, The Worldworthy 100 halyqaralyq redaktsııalyq reıtınginiń 2026 jylǵy shyǵarylymynda Almatynyń úsh týrıstik nysany álemniń úzdik 100 nysanynyń qataryna endi.
Іle-Alataýy memlekettik ulttyq tabıǵı parkimen baılanysty eki týrıstik baǵyt álemdik reıtıngte joǵary baǵalandy:
Kimasar shatqaly – álemdegi úzdik jaıaý týrıstik baǵyttar arasynda 56-orynda. Býtakov shatqaly– álemdik reıtıngte 79-oryn ıelendi. Sonymen qatar Shymbulaq aspaly joly álemdegi eń úzdik 100 aspaly jol reıtınginde 9-orynǵa ıe boldy.
Atalǵan úsh nysan da Worldworthy 100 reıtınginiń 2026 jylǵy laýreaty atanyp, arnaıy sertıfıkattarmen marapattaldy.
Worldworthy 100 – kelýshilerdiń pikirleri men baǵalaýlaryna, jýrnalıstik zertteýlerge jáne ashyq derekkózderdegi málimetterge negizdelgen halyqaralyq redaktsııalyq reıtıng.
-Bul jetistik Іle-Alataýynyń tabıǵı kórikti jerlerine halyqaralyq qyzyǵýshylyqty arttyryp, Qazaqstannyń ekotýrıstik áleýetin álemge tanytýǵa múmkindik beredi. Tabıǵatymyzdyń álemdik deńgeıde tanylýy – maqtanysh qana emes, ony saqtaý men qorǵaýdyń mańyzyn taǵy bir márte kórsetetin jetistik,-delingen habarlamada.
Osyǵan deıin Іle Alataýynda týrıstik topqa ilbis jolyqqany týraly jazdyq.
