Іle Alataýynda jas týrıst qutqaryldy
ASTANA. KAZINFORM — Іle Alataý taýynyń Qaskeleń shatqalyna kóterilgen qyz aýyryp qalǵan. Bul týraly TJM baspasóz qyzmeti málim etti.
Oqys oqıǵa keshe bolǵan. Іle Alataý taýynyń Qaskeleń shatqalyna bes týrısttan turatyn top kóterilgen. Alaıda toptyń bir múshesi aýyryp qalǵan. Baılanys bolmaǵandyqtan jáne topta qart áıel men balalar bolǵandyqtan, top jetekshisi qyzdy tastap, qalǵandaryn tómenge túsirgen. Ol TJM qutqarýshylaryn kómekke shaqyrýǵa májbúr bolǵan.
TJM RJQJ qutqarýshylary turaqqa túsken ótinish berýshilerge jetip, atalǵan koordınattar boıynsha zardap shegýshini izdestirýge kiristi. Іzdestirý jumystary 16 saǵattan astam ýaqytqa jalǵasty.
Zardap shekken qyz tońyp qalǵan eken. Qutqarýshylar oǵan alǵashqy kómek kórsetti jáne ony turaqta kútip turǵan týystaryna jetkizdi, — delingen vedomstvo habarlamasynda.
Eske salsaq, búgin túnde eki oblysta órt bolyp, mal izdeýge shyqqan er adam joǵalyp ketkeni belgili boldy.
