Іle Alataýynda muzdaq kólderdegi sý deńgeıin tómendetý jumystary bastaldy
ALMATY. KAZINFORM – Qazaqstannyń ońtústigindegi taýly aımaqtarda sel qaýpiniń kúsheıýine baılanysty Іle Alataýynda muzdaq kólderdegi sýdy tómendetý sharalary qolǵa alyndy. Bul týraly Tótenshe jaǵdaılar mınıstrligine qarasty «Qazseldenqorǵaý» memlekettik mekemesi habarlady.
Sel qaýpi kezeńi bastalǵan qazirgi ýaqytta aýa temperatýrasynyń joǵarylaýy men taýly óńirlerde jaýǵan nóserli jańbyrdyń áserinen muzdyqtardyń erip, muzdaq kólderge qarqyndy sý kelip jatqanyn mamandar atap ótti.
- Tótenshe jaǵdaılardyń aldyn alý maqsatynda 78 turaqty jáne 39 maýsymdyq baqylaý beketi táýlik boıy jumys istep tur. Bul beketter kólderdegi jaǵdaıdy úzdiksiz baqylap, kez kelgen ózgeriske jedel áreket etýge múmkindik beredi.
Muzdaq kólderge barlaý jáne aldyn alý jumystaryn júrgizý úshin «Qazavıaqutqarý» AQ-nyń tikushaǵy jumyldyrylyp, gıdrobeketter ashylyp, qajetti jabdyqtar men jumys toptary joǵary taýly ýchaskelerge jetkizildi, - dep jazdy vedomstvodan.
Qazirgi ýaqytta yqtımal qaýipti kólderde sý deńgeıin qaýipsiz shekterge deıin tómendetý jumystary bastalǵan. Sonymen qatar, kólderdiń túbin egjeı-tegjeıli zertteýge múmkindik beretin batımetrııalyq túsirilimder júrgizildi.
«Qazseldenqorǵaý» MM teńgerimindegi sel men kóshkin qaýpi bar ýchaskeler men gıdrotehnıkalyq qurylǵylarǵa turaqty túrde tekserý júrgizilýde. Sel jaǵdaıyn fondyq baǵalaý maqsatynda aerovızýaldy zertteý de iske asyrylyp otyr. Mamandardyń málimetinshe, qazirgi tańda qyzmet kórsetiletin aýmaqtarda sel qaýpi baqylaýda jáne jaǵdaı turaqty.
Sel qaýpi joǵary kezeńde halyqtyń qaýipsizdigin qamtamasyz etý maqsatynda taýly aımaqtarda demalýshylar, týrıster men jergilikti turǵyndar arasynda túsindirý jumystary júrgizilýde.
Osyǵan baılanysty Tótenshe jaǵdaılar mınıstrligi azamattardy taýly óńirlerde demalý nemese týrıstik joryqtarǵa shyqqanda barlyq saqtyq sharalaryn qatań saqtaýǵa shaqyrady. Atap aıtqanda, gıdrometeorologııalyq jaǵdaı týraly aqparatty naqtylaý, sel qaýpi kezinde qaýipsiz júris-turys erejelerin bilý jáne olardy oryndaý – qaýiptiń aldyn alýdyń negizgi tetigi bolyp qala beredi.
Aıta keteıik, Almaty taýlarynda 5 táýlik boıy izdestirilgen jasópirimniń máıiti tabyldy.