Іle-Alataýy ulttyq parkinde Qyzyl kitapqa engen úsh jyrtqysh bir mezette beınejazbaǵa túsip qaldy

ALMATY. KAZINFORM – Іle-Alataýy memlekettik tabıǵı parkiniń aýmaǵynda ornatylǵan fototuzaqqa bir soqpaq boıynda bir mezette úsh jyrtqysh ań – ilbis (Uncia uncia), Túrkistan sileýsini (Lynx lynx isabellinus) jáne Tıanshan qońyr aıýy (Ursus arctos isabellinus) túsip qaldy.

Barlyq janýarlar Qazaqstannyń Qyzyl kitabyna engen.

Bıylǵy fototuzaq materıaldary ilbistiń ádettegiden erterek tómenge túskenin kórsetti. Jyrtqysh shamamen 2000 metr bıiktiktegi orman beldeýinde baıqalǵan. Kadrlardan onyń óz aımaǵyn belgilep júrgen sátteri aıqyn kórinedi.

Sol aýmaqta Túrkistan sileýsini de tirkelgen. Qazirgi tańda ulttyq park aýmaǵynda bul túrdiń shamamen 178-i esepke alynǵan.

Fototuzaq beınelerinde sileýsinniń negizgi qoregi sanalatyn qum qoıan (Lepus tolai) da kóringen. Bul ekojúıede tabıǵı tepe-teńdik saqtalyp otyrǵanyn dáleldeıdi.

Jaz aılarynda osy baqylaý núktesinde Tıanshan qońyr aıýynyń da fototuzaqqa túsýi tirkelgen.

Mamandardyń aıtýynsha, mundaı derekter Іle-Alataýy tabıǵı kesheniniń jyrtqysh ańdarǵa qolaıly meken ekenin jáne ekojúıeniń turaqtylyǵyn aıǵaqtaıdy.

Ulttyq park qyzmetkerleri sırek kezdesetin ańdardy júıeli túrde baqylap, olardyń meken etý ortasyn qorǵaý jáne popýlıatsııasyn saqtaý baǵytynda turaqty jumystar júrgizýde.

Fototuzaq kadrlary – Іle-Alataýy tabıǵatynyń baı bıoalýantúrliligin dáleldeıtin qundy materıal sanalady.