Іle-Alataýy ulttyq parkinde baqylaý júıesi avtomattandyryldy
ALMATY. KAZINFORM – Іle-Alataýy memlekettik ulttyq tabıǵı parkiniń baqylaý-ótkizý beketterinde avtomattandyrylǵan júıe kezeń-kezeńimen iske qosylyp jatyr.
Іle-Alataýy memlekettik ulttyq tabıǵı parkiniń málimetinshe, demalys kúnderi Almarasan men Aıýsaı shatqaldaryna aǵylatyn avtokólikterdiń sany artyp, uzyn-sonar kezek pen keptelis týyndaıtyn. Osy máseleni sheshý úshin jańa júıe iske qosyldy. Endi avtokólik júrgizýshileri aldyn-ala tólem jasap, kedergisiz óte alady.
Jańa júıe kóliktiń memlekettik nómirin avtomatty túrde oqyp, QR-kod arqyly tólem jasaýǵa múmkindik beredi.
- Avtomattandyrylǵan júıe Almarasan, Qaskeleń, Butaqty jáne Túrgen shatqaldarynda iske qosyldy. Jaqyn ýaqytta Esik kóli jáne Aqsaı shatqalynda da ornatý josparda bar. Bul — kelýshiler úshin qolaıly jaǵdaı jasaý, ári kólik qozǵalysyn retteýge baǵyttalǵan mańyzdy qadam, - dep habarlady ulttyq parkten.
Eske salaıyq, buǵan deıin Іle-Alataýy tabıǵı parkiniń aýmaǵyndaǵy fototuzaqqa sırek kezdesetin janýarlar túsip qalǵanyn jazǵanbyz.