Іle Alataýy ulttyq parki 30 jylda ilbis sanyn tórt ese kóbeıtti
ALMATY. KAZINFORM — Bıyl Іle Alataýy ulttyq parki 30 jyldyǵyn atap ótip jatyr. 1996 jyly qurylǵan park sol kezde 164 450 gektar aýmaqty qamtysa, búginde onyń kólemi 200 160 gektarǵa jetti. 30 jyl ishinde erekshe qorǵalatyn tabıǵı aýmaq 35 710 gektarǵa ulǵaıǵan.
1996-2025 jyldar aralyǵynda ulttyq park aýmaǵynda 1 637 gektar jerge 5 010 000 túp aǵash kósheti otyrǵyzyldy. Qylqanjapyraqty jáne japyraqty aǵash túrlerin ósiretin jeti ýaqytsha tálimbaq jumys isteıdi.
30 jyl ishinde sırek jáne joıylyp ketý qaýpi bar janýarlar sany aıtarlyqtaı artqan:
• Іlbis — 5-10 daraqtan 39 daraqqa deıin;
• Qońyr aıý — 15-20 daraqtan 85-ke deıin;
• Tas sýsary — 100-den 493-ke deıin;
• Búrkit — 50-den 97 daraqqa deıin ósti.
Park aýmaǵynda eki genetıkalyq rezervat qurylǵan. Qyzyl kitapqa engen Sıvers almasynyń klon muraǵaty saqtalyp, genetıkalyq qordy qorǵaý jumystary júrgizilip jatyr.
2024 jyly ulttyq parkter arasynda alǵash ret in-vitro zerthanasy ashylyp, sırek, endemık jáne relıkt ósimdikterdi jasandy ortada kóbeıtý bastaldy. Sonymen qatar Botanıka jáne fıtoıntrodýktsııa ınstıtýtymen birlesip Sıvers almasyn zertteýdiń 5 jyldyq baǵdarlamasy júzege asyrylyp jatyr.
Aıta keteıik, 1996 jyly parkke 27,4 myń adam kelse, 2025 jyly kelýshiler sany 945,9 myń adamǵa jetti. Bul — 34,5 ese ósim. Al týrıstik marshrýttar sany 8-den 46-ǵa deıin artty. Aldaǵy úsh jylda taǵy 30 jańa baǵyt ashý josparda bar.
Eske salaıyq, buǵan deıin Іle Alataýyn mekendeıtin ilbister vıdeoǵa túsip qalǵanyn jazǵanbyz.