Túrkııa turǵyndarynyń basym bóligi ózderin baqyttylar sanatyna jatqyzady
ASTANA. KAZINFORM — Túrkııada sýbektıvti baqyt deńgeıi 53,3%-ǵa deıin ósti. Alaıda qoǵamdy alańdatatyn basty másele – baǵanyń qymbattaýy. Bul týraly Kazinform agenttiginiń Ankaradaǵy menshikti tilshisi habarlady.
Türkiye İstatistik Kurumu (TÜİK) jarııalaǵan «Ómirge qanaǵattaný – 2025» zertteýiniń nátıjesine sáıkes, 18 jastan asqan turǵyndardyń 53,3%-y ózderin baqyttymyn dep ataǵan. Bul ótken jylmen salystyrǵanda 3,7 paıyzdyq tarmaqqa joǵary (49,6%-dan 53,3%-ǵa deıin). Al ózin baqytsyz sanaıtyndar úlesi 14,5%-dan 13%-ǵa deıin azaıǵan.
Áıelder erlerge qaraǵanda baqyttyraq
Genderlik aıyrmashylyq saqtalyp otyr: erlerdiń 51,4%-y ózin baqytty sanasa, áıelder arasynda bul kórsetkish 55,1%-dy quraǵan. ıAǵnı áıelderdiń sýbektıvti ál-aýqat deńgeıi joǵary.
Eń úlken ósim – 55–65 jas aralyǵynda
Barlyq jas toptarynda oń dınamıka baıqalady. Eń joǵary ósim 55–65 jas aralyǵyndaǵy azamattar arasynda tirkelgen: bul sanatta baqyt deńgeıi 47,5%-dan 54,6%-ǵa deıin artqan.
Basqa jas toptaryndaǵy kórsetkishter:
• 18–24 jas – 54,4%;
• 25–34 jas – 53,6%;
• 35–44 jas – 52,9%;
• 45–54 jas – 50,8%;
• 65 jas jáne odan joǵary – 54,3%.
Otbasy – baqyttyń basty kózi
Otbasylyq jaǵdaı ómirge qanaǵattaný deńgeıine tikeleı áser etedi. Nekede turǵandardyń 56,9%-y ózin baqytty sanaıdy, al boıdaqtar arasynda bul kórsetkish 46,6%-dy quraıdy. Turmystaǵy áıelderdiń 59,6%-y ózin baqytty dep baǵalasa, úılengen erler arasynda bul úles 54,2%.
Saýalnamaǵa qatysqandardyń 69%-y úshin baqyttyń negizgi kózi – otbasy. Odan keıin balalar (15,6%) jáne jeke tulǵalyq qasıetteri (4,8%) atalǵan. Ómirlik qundylyqtar arasynda densaýlyq (64,9%) birinshi orynda. Sondaı-aq mahabbat, tabys, materıaldyq ál-aýqat jáne jumys mańyzdy faktorlar retinde kórsetilgen.
Optımızm saqtalǵan
Ekonomıkalyq qıyndyqtarǵa qaramastan, respondentterdiń 67,1%-y bolashaqqa úmitpen qaraıtynyn aıtqan. Bul kórsetkish erler men áıelder arasynda shamalas.
Ómirge qanaǵattanýdyń ortasha deńgeıi 0-den 10-ǵa deıingi shkala boıynsha 5,7 baldy quraǵan. Bul ótken jylmen birdeı, ıaǵnı jalpy ómir sapasyn qabyldaý turaqty kúıinde qalyp otyr.
Negizgi másele – qymbatshylyq
Sonymen birge, qoǵamda eleýli alańdaýshylyq bar. Respondentterdiń 31,3%-y eldegi eń ózekti másele retinde qymbatshylyqty ataǵan. Budan keıin kedeılik (16,5%) jáne bilim berý máseleleri (16,1%) tur.
Osylaısha, zertteý nátıjeleri belgili bir paradoksty kórsetedi: ınflıatsııalyq qysym men áleýmettik-ekonomıkalyq qıyndyqtarǵa qaramastan, Túrkııada sýbektıvti baqyt deńgeıi artyp keledi. Degenmen ekonomıkalyq ahýal qoǵam kóńil kúıine áser etetin negizgi faktor bolyp qala beredi.
Buǵan deıin Túrkııanyń halyq sanynyń qartaıý úderisimen betpe-bet kelip otyrǵany týraly habarlanǵan edi. Eldiń keıbir óńirlerinde turǵyndardyń ortasha jasy 43 jasqa jetken.
Al TMD ishinde Qazaqstan eń baqytty el retinde tanylǵanyn jazǵan edik.