Іle-Alataýy parkinde Tıan-Shan qońyr aıýy fototuzaq obektıvine ilikti

ALMATY. KAZINFORM — Qazaqstannyń Qyzyl kitabyna engizilgen Tıan-Shan qońyr aıýy (Ursus arctos isabellinus) Іle-Alataýy memlekettik ulttyq tabıǵı parkinde fototuzaqtyń obektıvine iligip qaldy. Bul týraly Orman sharýashylyǵy jáne janýarlar dúnıesi komıteti málim etti.

Fototuzaq obektıvine ilikken jyrtqyshtar otrıadyna jatatyn sırek janýarlar — ǵylymı monıtorıng nátıjesi.

— Іle-Alataýy memlekettik ulttyq tabıǵı parkinde bul janýarlar taýdyń qylqanjapyraqty jáne japyraqty ormandarynda, sýbalpi jáne alpi beldeýlerinde, sondaı-aq quzdar men tasty aımaqtarda mekendeıdi, — dep jazdy komıtetten.

Sońǵy derekterge sáıkes, ulttyq parkte 82 daraǵy tirkelgen.

Mamandardyń aıtýynsha, qarasha aıynyń basynda Tıan-Shan qońyr aıýlary qystyq uıqyǵa ketedi. Bul erekshe janýar — ekojúıeniń mańyzdy bóligi. Olardy saqtaý — árqaısymyzdyń ortaq mindetimiz.

Eske sala keteıik, buǵan deıin Saıram-Ógem parkinde Qyzyl kitapqa engen Tıan-Shan qońyr aıýy fototuzaqqa túsip qalǵan edi. 

Ekologııalyq monıtorıng derekterine sáıkes, qar barysy, Tıan-Shan qońyr aıýy, Qarataý arqary jáne ózge de sırek kezdesetin ańdardyń sany jyldan-jylǵa turaqty túrde artyp keledi.