Іle-Alataý ulttyq parkindegi órtti sóndirýge tikushaq tartyldy

ALMATY. KAZINFORM — Búgin shamamen saǵat 12:15 kezinde Іle-Alataý ulttyq parkiniń aýmaǵynda órt shyqty. Órtti sóndirý jumystary saǵat 13:05–te bastaldy. 

«Qazáýeormanqorǵaý» Almaty avıatsııalyq bólimshesiniń basshysy Bekzat Baıshalovtyń aıtýynsha, oqıǵa ornynda órt sóndirý toptary jumys istep jatyr. Barlyǵy 8 arnaıy tehnıka, 1 órt sóndirý tikushaǵy jáne 25 adamnan turatyn jeke quram tartylǵan.

— Órt deńgeıi ortasha dep baǵalandy. Qazirgi ýaqytta jedel órt sóndirý jáne jaǵdaıdy baqylaý jumystary júrgizilip jatyr. Órttiń shyǵý sebepteri ázirge anyqtalǵan joq. Aldyn ala málimet boıynsha, jaqyn mańdaǵy eldi mekender men týrıstik baǵyttarǵa qaýip joq, — dep habarlady «Qazáýeormanqorǵaý» bólimshesinen.

Órt saǵat 14:20–da oqshaýlandy. Jalyn shamamen 1,7 gektar aýmaqty sharpyǵan.

Eske salaıyq, buǵan deıin Almaty ormandarynda ot jaqqan 100-den astam adam jaýapqa tartylǵanyn jazǵanbyz.