Іlbister turan jolbarysynyń taǵdyryn qaıtalaýy múmkin – Ekologııa mınıstrligi

ASTANA. KAZINFORM – Qazaqstanda ilbisterdiń azaıýyna ańshylar men malshylardan bólek jer qoınaýyn ıgerýshiler de «úles qosyp» jatyr. Ekologııa jáne tabıǵı resýrstar mınıstrliginiń Kazinform saýalyna joldaǵan jaýabynda osyndaı málimet aıtylǵan.

- Іlbis popýlıatsııasynyń ósýine negizgi kedergiler – brakonerlik, malshylarmen qaqtyǵystar, mekendeý ortasynyń buzylýy, tuıaqty janýarlar sanynyń qysqarýy, ınfraqurylymdyq jobalar, ýrbanızatsııa jáne paıdaly qazbalardy óndirý. Jyl saıyn Qazaqstanda adamnyń tikeleı yqpaly saldarynan 3–5 ilbis qyrylyp jatyr, - dep jazady vedomstvo mamandary.

Vedomstvodaǵylar ilbisterdi qorǵaý sharalaryn jetildirmese, sırek janýar turan jolbarystarynyń taǵdyryn qaıtalaýy múmkin dep otyr.

- Qabyldanyp jatqan sharalarǵa qaramastan, klımattyń ózgerýi men álemdik popýlıatsııanyń azaıýy saldarynan ilbistiń Qazaqstan aýmaǵynda joıylý qaýpi áli de joǵary. Eger qorǵaý sharalary jetkiliksiz bolsa, popýlıatsııa odan ári azaıyp, bul túrdiń joıylyp ketý qaýpin týdyrýy múmkin. Mundaı jaǵdaı buryn turan jolbarysy sııaqty iri jyrtqyshtardyń joıylýyna ákelgen bolatyn, - delingen resmı málimette.

Eske salsaq, Prezıdent Qasym-Jomart Toqaev Býrabaıdaǵy Ulttyq quryltaıda ilbisterdi saqtap, sanyn kóbeıtý kerektigin aıtqan edi.