Almaty mańynda júrgen ilbiske spýtnıktik qarǵybaý taǵyldy
ASTANA. KAZINFORM – Janýarǵa spýtnıktik qarǵybaý ornatylyp, densaýlyq jaǵdaıyn baǵalaý jáne múmkin bolatyn aýrýlardy joqqa shyǵarý úshin qajetti bıomaterıaldar alyndy.
Jaqynda Іle-Alataýy memlekettik ulttyq tabıǵı parkiniń aýmaǵynda, Almaty qalasynyń ákimshilik shekaralary sheginde ornalasqan Úlken Almaty shatqalynda ilbis avtojolǵa jaqyn jerde maraldy aýlap ustaǵan. Bul halyq jıi demalatyn oryn bolǵandyqtan, jemtigin jep jatqan jyrtqyshty adamdar tez baıqap úlgergen. Aqparat áleýmettik jelilerde lezde tarap, kelesi kúni bul jerge kelýshiler sany arta túsken.
Ulttyq park qyzmetkerleri men ǵalymdardyń túsindirgenine qaramastan, kóp adam jabaıy ańǵa tym jaqyn dron ushyryp, erekshe qorǵalatyn tabıǵı aýmaqtaǵy júris-turys qaǵıdalaryn buzǵan.
— Kópshilik onyń Qyzyl kitapqa engizilgen sırek kezdesetin túr ekenin jáne óz oljasyn qorǵap turǵan áleýetti qaýipti jyrtqysh ekenin eskermedi. Mundaı áreketter janýar úshin aıtarlyqtaı kúızelis týdyryp, adamdardyń qaýipsizdigine de qater keltirdi.
Іlbisti qorǵaý jáne yqtımal jaǵymsyz saldardyń aldyn alý maqsatynda mamandar ony ýaqytsha aýlaý týraly sheshim qabyldady. Janýarǵa spýtnıktik qarǵybaý ornatylyp, densaýlyq jaǵdaıyn baǵalaý jáne múmkin bolatyn aýrýlardy joqqa shyǵarý úshin qajetti bıomaterıaldar alyndy. Barlyq rásim qysqa merzimdi narkoz jaǵdaıynda, halyqaralyq veterınarııalyq jáne etıkalyq standarttardy qatań saqtaı otyryp, kásibı mamandar toby tarapynan júrgizildi, — delingen habarlamada.
Spýtnıktik qarǵybaý Zoologııa ınstıtýtynyń mamandarynyń, Іle-Alataýy ulttyq tabıǵı parki qyzmetkerleriniń, Almaty zoobaǵynyń jáne «Snow Leopard Foundation» qory sarapshylarynyń qatysýymen ornatyldy.
Spýtnıktik qarǵybaý mynadaı múmkindikter beredi:
- Almaty qalasy sııaqty iri eldi mekenge jaqyn aýmaqta qar barysynyń qozǵalysyn baqylaý;
- janýar qaýipti aımaqqa jaqyndaǵan jaǵdaıda jedel áreket etý;
- adam men jabaıy tabıǵat arasyndaǵy qaqtyǵystardyń aldyn alý;
- sırek kezdesetin jyrtqyshty qosymsha qorǵaý.
Aıta ketý kerek, ornatylǵan qarǵybaý tótenshe jaǵdaı anyqtalǵan jaǵdaıda qashyqtan ajyratý fýnktsııasymen jabdyqtalǵan. Sonymen qatar, avtomatty túrde bosaý mehanızmi bar: bir–eki jyl ishinde qarǵybaý janýardan ózdiginen ajyraıdy.
— Zerthanalyq taldaý nátıjeleri boıynsha ilbistiń tolyqtaı saý ekeni jáne eshqandaı aýrýǵa shaldyqpaǵany anyqtaldy. Qazirgi ýaqytta jyrtqysh atalǵan aýmaqtan qaýipsiz túrde ketip, ózine tán tabıǵı aýmaqqa jiberildi. Degenmen, bul oqıǵaǵa degen qyzyǵýshylyq áli de saqtalyp otyr. Osyǵan baılanysty barshańyzdy taýly aımaqtarda belgilengen erejelerdi saqtaýǵa, jabaıy tabıǵatty qurmetteýge jáne adam qaýipsizdigi men sırek kezdesetin túrlerdi saqtaý árqaısymyzdyń jaýapkershiligimizge tikeleı baılanysty ekenin umytpaýǵa shaqyramyz, — delingen Orman sharýashylyǵy jáne janýarlar dúnıesi komıteti habarlamasynda.
Aıta ketelik fotograf Almaty taýlarynda ilbistiń ań aýlaǵan sátin túsirip alǵan edi.