Lázzat Tanysbaı otandyq serıal óndirýdegi basty problemalardy atady
NUR-SULTAN. QazAqparat – Otandyq serıal óndirýshilerde qandaı másele bar? Olar memleketten qandaı jeńildik suraıdy? Bul suraqqa «Qazaqstan» RTRK» AQ Basqarma tóraǵasy Lázzat Tanysbaı jaýap berdi, dep habarlaıdy QazAqparat tilshisi.
«Osydan on jyl buryn tuńǵysh «Aǵaıyndylar» atty serıal túsirildi. Ol kezde serıal túsirý eshkimniń oıyna kelmeıtin edi. Aqan Sataevty barlyǵymyz da kúshtep úgittegenimiz esimde. Biraq, arada 10 jyl ótse de, sol «Aǵaıyndylar» nómiri birinshi serıal bolyp qalyp otyr. Bul, árıne, bir jaǵynan alańdatady. Nelikten? Biz qarjylandyrý týraly kóp aıtyp jatyrmyz. Bul rette baǵany eskerý kerek. On jyl buryn eshkim bul salaǵa jaqyndaǵysy kelmegen edi. Al bir aı buryn serıal naryǵyndaǵy kompanııalardy jınap kórsek, 15 iri kompanııa jınaldy. 10 jyldyń ishinde naryqtyń qalaı damyp ketkenin osydan-aq esepteı berińiz», - dedi Lázzat Tanysbaı elordada ótip jatqan Astana Media Week sharasynda.
Onyń aıtýynsha, osy jyly birinshi ret Qazaqstan serıal naryǵynda detektıv janryndaǵy serıal túsirilýde.
«Serıal óndirýshilermen máselelerin talqylaǵan kezde eń aldymen bári baǵa jaıyn aıtady. Bári de salyqtyq jeńildikti suraıdy. Óz kezegimizde telearna tarapynan serıal túsirýshilerge degen talaptarymyz, aıtar synymyz bar. Men olarǵa «sońǵy jyldary barlyq arnada bir uzyn-sonar melodrama júrip jatqan sekildi» deımin. Sol baıaǵy akterlar – shamamen 10-15 adam barlyq serıalda túse beredi. Sol baıaǵy rejısserler. Rejısserdiń stılin tanyp qoıǵannan keıin kórermenniń kórgisi de kelmeýi múmkin. Jýyqta «Abaı» serıalyna konkýrs jarııaladyq. Álbette, bul óte zor jaýapkershilik bolǵannan keıin bul serıaldy túsirýden jasqanshaqtap otyrǵan jaıymyz bar», - dedi Lázzat Tanysbaı.
«Qazaqstan» RTRK» AQ Basqarma tóraǵasy «Abaı» serıaly boıynsha konkýrsqa alty kompanııa ǵana ótinish bildirgenin aıtady.
«Ol alty kompanııanyń tek bireýinde ǵana tarıhı serıal túsirý tájirıbesi bar eken. Bul bárimiz úshin úlken problema. Bárine ıaǵnı, tájirıbe kerek», - dedi Lázzat Tanysbaı.
Eske sala ketsek, elordadaǵy «Qazmedıa» ortalyǵynda úsh kúnge sozylatyn Ortalyq Azııadaǵy eń iri medıa-oqıǵa — Astana Media Week ótip jatyr.
Astana Media Week-tiń birinshi kúni serıaldyq ónimderdi ázirleý jáne shyǵarý taqyrybymen jáne salyq preferentsııalary, kıno prokatynyń sharttary, mazmuny, fılm óniminiń shyǵarmashylyq deńgeıi jáne onyń demeýshiler úshin tartymdylyǵy taqyrybymen erekshelenedi.
