Lázzat Tanysbaı: Ǵalamtor – teleónimderdi keń aýdıtorııaǵa jetkizýdiń qosymsha quraly

NUR-SULTAN. QazAqparat - Koronavırýs pandemııasy kezinde sapaly ári tekserilgen aqparatqa qajettilik týyp, bul BAQ reıtıngin kóterýge yqpal etti. Bul týraly «QAZAQSTAN» RTRK» AQ Basqarma tóraıymy Lázzat Tanysbaı otandyq BAQ salasyn damytý máselelerine arnalǵan dóńgelek ústel jıynynda aıtty, dep habarlaıdy QazAqparat.

Lázzat Tanysbaı televızııa mamandary ǵalamtordy óz ónimderimizdi keń aýdıtorııaǵa jetkizýdiń qosymsha quraly retinde qarastyryp otyrǵanyn atap ótti.

«Ǵalamtordyń damýymen birge teleónimge qol jetkizýdiń múmkindikteri artty. Máselen, Youtube ınternet-platformasynda eń kóp qaralym jınaıtyn televızııalyq jobalar ekenin aıta ketken jón. Sońǵy 90 kúnde Youtube-taǵy tanymal jobalardyń úzdik jıyrmalyǵyn otandyq telearnalardyń kontenti qurap otyr. «QAZAQSTAN» arnalaryn alatyn bolsaq, ınternettegi aýdıtorııamyzdyń sany 6 mln-ǵa jýyqtap qaldy. Youtube jazylýshylar sany – 4,5 mln. ıAǵnı, bul – kúndelikti dástúrli teleaýdıtorııadan bólek, bizdiń ónimderimizdi qosymsha tutynatyn kórermen», – dedi Lázzat Tanysbaı.

TNSGallupMedia kompanııasynyń derekteri boıynsha pandemııa kezinde aýdıtorııa naqty aqparatty telearna jańalyqtarynan izdegen. Respondentterdiń 52%-y dástúrli medıany, onyń ishinde televızııany eń senimdi aqparat kózi retinde tańdaǵan. Atalǵan kezeńde teledıdar kórý belsendiligi Qazaqstanda 22% -ǵa artty.

Sonymen qatar, telearnalarda keıingi kezde tikeleı efır formatyna basymdyq berilip jatqany sóz boldy.