Senat azamattardy sot arqyly qorǵaýdyń sapasyn arttyrýǵa baǵyttalǵan zańdy maquldady

ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine sot júıesin reformalaý jáne protsestik zańnamany jetildirý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.

Zań Memleket basshysynyń sot júıesin reformalaý jáne is júrgizý zańnamasyn jetildirý jónindegi tapsyrmalaryn iske asyrý aıasynda Parlament depýtattarynyń bastamasymen ázirlengen.

Senator Nurlan Beknazarovtyń aıtýynsha, zańnyń maqsaty – qoldanystaǵy Kodekster men zańdardyń normalaryn osy jylǵy maýsym aıynda Palatalardyń birlesken otyrysynda qabyldanǵan «Qazaqstan Respýblıkasynyń keıbir konstıtýtsııalyq zańdaryna ózgerister men tolyqtyrýlar engizý týraly» Konstıtýtsııalyq Zańyna sáıkestendirý.

Osy qujat aıasynda Qylmystyq-protsestik, Azamattyq protsestik, Ákimshilik rásimdik-protsestik kodeksterine, sondaı-aq birqatar basqa da zańdarǵa túzetýler engizý kózdelgen.

Olardyń negizgileri:

- azamattyq jáne qylmystyq ister boıynsha kassatsııalyq satyda isterdi aldyn ala qaraý satysy alynyp tastalady;

- kassatsııalyq sottarda qylmystyq jáne azamattyq isterdi qaıta qaraýdyń alty aıǵa deıingi merzimi belgilenedi;

- kassatsııalyq sotqa qoljetimdilikti arttyrý úshin 2027 jylǵy 1 shildeden bastap talap qoıý somalary jeke tulǵalardyń múliktik talaptary boıynsha 2 000, zańdy tulǵalardyń talaptary boıynsha 30 000 AEK-ten tómen daýlar boıynsha, sondaı-aq qylmystyq teris qylyqtar men onsha aýyr emes qylmystar boıynsha kassatsııalyq sotqa joldanýǵa qatysty shekteýlerdi alyp tastaý qarastyrylǵan;

- erekshe jaǵdaılarda kassatsııalyq satyda qaralǵan keıbir sot aktilerin Joǵarǵy Sot sýdıasynyń usynýy nemese Bas prokýrordyń narazylyǵy boıynsha Joǵarǵy Sotta qaıta qaraý tártibi engiziledi;

- Bas prokýrordan basqa onyń orynbasarlaryna, Bas áskerı prokýrorǵa, Bas kólik prokýroryna kassatsııalyq sotqa narazylyq bildirý quqyǵy beriledi.

«Sot aktisin shyǵarý máselesinde protsestik qatynastardyń turaqty bolýy úshin Azamattyq protsestik kodeksinde «keńesý bólmesi jáne onyń qupııalary» ınstıtýty qalpyna keltirildi. Budan bólek, Qazaqstan Respýblıkasynyń aýmaǵynda ekstremızmdi nemese terrorıstik is-áreketti júzege asyratyn uıymdy taný týraly azamattyq isterdi qaraýdyń jedeldigi úshin isterdi qaraý merzimderin 1 aıdan 10 jumys kúnge deıin qysqartylady», - dedi senator.

Depýtattyń sózine qaraǵanda, qujat aıasynda ákimshilik ister boıynsha sot aktileriniń apellıatsııalyq shaǵym jasalǵannan keıin zańdy kúshine enetin tártibi aıqyndaldy.

Munymen qosa, «Qazaqstan Respýblıkasynyń Joǵary Sot Keńesi týraly» Zańǵa sýdıa laýazymyna úmitkerlerdi konkýrstyq negizde irikteý rásimderin Konstıtýtsııalyq zańnyń normalaryna sáıkes keltirýge baǵyttalǵan túzetýler engizilgen.

«Atap aıtqanda, zań qylmystyq, azamattyq jáne ákimshilik ister boıynsha kassatsııalyq satynyń qyzmetin jetildirýmen qatar, azamattardyń ashyq, ádil sot tóreligine qoljetimdiligin qamtamasyz etip, sot arqyly qorǵalý quqyǵyn tıimdirek iske asyrýǵa yqpal etedi», - dedi depýtat.

Jalpy, zańda azamattardyń quqyqtary men zańdy múddelerin sot arqyly qorǵaýdyń sapasyn arttyrýǵa múmkindik beretin normalar engizý kózdelgen.

«Osyǵan baılanysty, derbes kassatsııalyq sottardy qurý, sot isin júrgizýdiń barlyq túrleri boıynsha kassatsııalyq sottarǵa joldaný jáne sot aktilerin qaıta qaraýdyń biryńǵaı qaǵıdalaryn engizý usynylyp otyr. Іsterdi kassatsııalyq satydaǵy sotta qaraýdy sot tóraǵasynyń ne onyń tapsyrmasy boıynsha sýdıalardyń bireýiniń tóraǵalyq etýimen kassatsııalyq sot sýdıalarynyń taq sandy (keminde úsh) sottyń alqaly quramy júrgizedi. Zańmen kassatsııalyq satyda júginý tártibin ońaılatý maqsatynda qylmystyq jáne azamattyq ister boıynsha azamattardyń sot aktilerin qaıta qaraý týraly ótinishhaty kassatsııalyq shaǵymǵa ózgertiledi. «Memlekettik qyzmet týraly» Zańǵa Sot Ákimshiligi men Joǵary Sot Keńesiniń laýazymdyq qyzmetkerleriniń kadrlyq retteý jáne áleýetin kúsheıtýge qatysty ózgerister usynylǵan», - dedi Nurlan Beknazarov.

Osyǵan deıin Senat Anastasııa Şegortsovany OSK múshesi qyzmetinen bosatqanyn jazdyq.

c/