Lázzat Súleımen: Smaıylovtyń Úkimetine syn da, úmit de kóp bolady
NUR-SULTAN. QazAqparat – Búgin bekitilgen Álıhan Smaıylovtyń úkimetine syn da, úmit de kóp bolady. Sondyqtan da kúterimiz kóp. Senat depýtaty Lázzat Súleımen jańa úkimet quramyna baılanysty osyndaı pikir bildirdi, dep habarlaıdy QazAqparat.
Senatordyń aıtýynsha, Prezıdent Qasym-Jomart Toqaev elimizde qalyptasqan jaǵdaıǵa túbegeıli ózgeris kerek ekenine múddeli ekenin kórsetti. Eń aldymenen bılik halyqtyń senimin qaıtaryp alý kerek. Bılik halyqqa esepte bolýy jáne bılikpen halyq birge bolýy kerek. Bul halyqtyń da aıtyp otyrǵan talaby.
Memleket basshysy qazirgi qoǵamda áleýmettik-ekonomıkalyq ádiletsizdik týǵyzyp otyrǵan máselelerdi tizip aıtyp, memlekettik ınstıtýttardy qalaı damytý kerektigi týraly naqty baǵyttar berdi. Egerde ol nátıje bermese, ol ınstıtýttardyń taratylatyndyǵy týraly aıtty. Bul halyqtyń ál-aýqatyn jaqsartýǵa yqpal etedi, jáne jastardyń, ásirese jumyssyz jastardyń ekonomıkanyń bir múshesi ekenin sezinýlerine múmkindik beredi.
«Búgingi bekitilgen Premer-Mınıstrdiń kandıdatýrasyn biz de qoldaımyz. Árıne, Smaıylovtyń úkimetine syn da, úmit de kóp bolady. Sondyqtan da bul Úkimetten kúterimiz kóp. Ekonomıkalyq reformalardy tezdetip júzege asyrýymyz kerek.
Al endi osylardyń bárin júzege asyrý úshin bılikte halyqtyń ózinen shyqqan, halyqqa jany ashıtyn, óz múddesinen halyqtyń múddesin joǵary qoıatyn azamattar bolý kerek. Basqa jol joq bizde», - dep atap ótedi Lázzat Súleımen.
