Lázzat Shyńǵysbaeva orfandyq aýrýlardy emdeýge qatysty problemany atady
ASTANA. KAZINFORM — Sırek kezdesetin aýrýlardy emdeýge jetkizilgen dári-dármekke dárigerler jaýapkershilikpen qaraýy tıis. Bul týraly «Qazaqstan halqyna» qoǵamdyq qorynyń basqarma tóraǵasy Lázzat Shyńǵysbaeva málim etti.
Qor baǵdarlamasynda Tegin medıtsınalyq kómektiń kepildik berilgen kólemi jáne mindetti áleýmettik medıtsınalyq saqtandyrý júıesi aıasynda memleket usynbaıtyn sırek (orfandyq aýrýlar) jáne aýyr aýrýlary bar azamattardy qymbat, zamanaýı, ınnovatsııalyq jáne tirkelmegen dárilik zattarmen qamtamasyz etý eskerilgen. Ekinshi baǵyt boıynsha onkologııalyq jáne onkogematologııalyq aýrýlary bar naýqastarǵa preparattar jetkizý qarastyrylǵan.
- Osy eki baǵytta biz dári-dármek alyp jatyrmyz. Onkologııa boıynsha elimizde memleket bekitken baǵdarlama bar. Jalpy Qazaqstan boıynsha onkologııa salasyn damytýǵa erekshe mán berilip otyr. Bul jerde «Qazaqstan halqyna» qory úsh pýnkt aıasynda qatysady. Birinshisi – qural-jabdyqtar, ekinshisi – dári-dármek, úshinshisi – qazir osy salada jumys istep júrgen myqty mamandardy sheteldiń ozyq oqý oryndarynda oqytý. Atap aıtqanda, osy qadamdardy qazir júzege asyryp jatyrmyz, - dedi L. Shyńǵysbaeva «Jibek Joly» telearnasynyń «Ýáde» baǵdarlamasynda.
Jumystyń mańyzdy baǵyty aýyr jáne orfandyq aýrýlary bar patsıentter úshin dárilik preparattardy satyp alýǵa arnalǵan. Qor úsh jylda 490 adamǵa 64 mlrd teńge somasyna dárilik zattardy satyp aldy.
- Osy salada birshama ózgeris engizip jatyrmyz. Bul naýqastar elimizdiń óńirlerinde turady. Dári-dármek máselesi tek qana densaýlyq saqtaý júıesiniń ishinde bolýy kerek. Qoǵamdyq qor satyp alyp jatqan dári densaýlyq saqtaý júıesiniń syrtynda qalyp qoıyp otyr. Máselen, dáriniń qarajatyn biz tólesek, osy preparat óńirlerge jetkiziledi. Osy dárini jergilikti densaýlyq saqtaý basqarmasy medıtsınalyq uıymdarǵa taratady. Keıbiri qaıyrymdylyq qarajatyna alynǵan preparattarǵa beı-jaı qaraıdy degen kúmán bar, ıaǵnı suraýy joq zat retinde qaraýy múmkin. Mundaı kózqaras durys emes. Naqty aıtqanda, bizge kóptegen naýqas habarlasyp, jetkizilgen dári-dármekti qalaı paıdalaný kerek ekenin bilmeıtinin málimdedi. Bizdiń qoǵamdyq qor medıtsınalyq uıym emes qoı?! Biz tek qana kelisimshartqa otyryp, preparattarǵa qajet qarajatty aýdaramyz. Ary qaraı osy dárini em-domǵa paıdalaný jaǵyn dárigerler retteýi tıis. Orfandyq aýrýlarǵa arnalǵan dári-dármek óte qymbat ekenin túsiný kerek, ıaǵnı qatań baqylaýda bolýy qajet, - dedi Lázzat Shyńǵysbaeva.
Aıta keteıik, Qazaqstanda Memleket basshysy Qasym-Jomart Toqaevtyń tapsyrmasy boıynsha «Qazaqstan halqyna» qoǵamdyq áleýmettik qory (QÁQ) quryldy.
Eske salsaq, bıyl qańtar aıynda «Qazaqstan halqyna» Qoǵamdyq qoryn úsh jyl boıy basqarǵan Bolat Jámishev qyzmetinen ketti.
Ol bul qyzmetke 2022 jyldyń qańtarynda taǵaıyndalǵan edi. Basqarma tóraǵasy bolyp saılanǵan ókilettik merziminiń aıaqtalýyna baılanysty B. Jámishev Qordaǵy jumysyn aıaqtaý týraly sheshim qabyldady.