Lazzat Ramazanova: Prezıdent tapsyrmasy – áıelder úshin qosymsha áleýmettik lıft

NUR-SULTAN. QazAqparat - Memleket basshysynyń kvazımemlekettik sektordyń basshylyq laýazymdaryndaǵy áıelderdiń úlesin arttyrý týraly tapsyrmasy jaqsy áleýmettik lıft bolady. Bul týraly QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Lazzat Ramazanova komıssııanyń keńeıtilgen keńesinde málim etti, dep habarlaıdy QazAqparat tilshisi.

L.Ramazanova Qazaqstan Respýblıkasynda 2030 jylǵa deıingi otbasylyq jáne genderlik saıasat tujyrymdamasyna engizilgen memlekettik, kvazımemlekettik sektor men korporatıvtik kompanııalardaǵy áıelderdiń úlesin arttyrý bóligindegi normany iske asyrýǵa Prezıdent bastaý bergenin atap ótti.

Tujyrymdamanyń birinshi kezeńi (2020 jylǵa deıin) aıaqtaldy. Qazir ulttyq jáne óńirlik komıssııalardyń músheleri Memleket basshysy belgilegen jańa mindetterdi oryndaýǵa baǵyt alýy tıis.

«Memleket basshysynyń áıelderdiń memlekettiń qatysýy bar kompanııalardaǵy ókildigine nazar aýdarǵany qýantady. Mundaı kásiporyndar genderlik strategııany iske asyrýǵa durys baǵdar bere alady. Osyǵan baılanysty ortalyq jáne jergilikti atqarýshy organdar kvazımemlekettik sektordy damytýǵa qatysty barlyq normatıvtik qujattardy kezeń - kezeńimen sáıkestendirýi tıis», - dep atap ótti Lazzat Ramazanova.

Sonymen qatar, Lazzat Ramazanovanyń pikirinshe, áıelderge jańa múmkindikter ashylýda.

«Prezıdenttiń tapsyrmasy – áıelder úshin qosymsha áleýmettik lıft. Búginde áıelder halyqtyń 52% quraıdy. Olar alǵa qoıylǵan mindetterdi júzege asyrýǵa óz úlesterin qosatyndaryna senimdimin. Bıznes-sektoryndaǵy áıelderdiń áleýeti barynsha belsendi paıdalanylatyndyqtan búkil eldiń ál-aýqaty ósedi», - dep túıindedi Ulttyq komıssııa tóraıymy.

Esterińizge sala keteıik, Ulttyq qoǵamdyq senim keńesiniń tórtinshi otyrysynda Qazaqstan Prezıdenti Qasym-Jomart Toqaev memlekettiń qatysýy bar kompanııalardyń basshy laýazymdaryndaǵy áıelder úlesin 30% deıin arttyrý qajettigi týraly málimdedi. Mundaı norma bıznes salasyn áıelder úshin neǵurlym tartymdy etedi, tıisti halyqaralyq reıtıngterdegi Qazaqstannyń pozıtsııasyn arttyrady.