Lázzat Qojahmetova: Aýyldaǵylar úshin 6 paıyzdyq nesıeniń áýresi kóp

NUR-SULTAN. QazAqparat – Aýyldaǵy turǵyndarǵa 6 paıyzdyq nesıeni berý sharttaryn jeńildetý kerek. Bul týraly Ulttyq qoǵamdyq senim keńesiniń tórtinshi otyrysynda keńes múshesi Lázzat Qojahmetova málim etti, dep habarlaıdy QazAqparat tilshisi.

«Aýyl turǵyndaryna 6 paıyzdyq nesıe bar. Ókinishke qaraı, «QazAgro» holdıngine qarasty aktsıonerlik qoǵamdar aýyldaǵy múlikterdi óte tómen baǵalaıdy. Mysaly, bir úıdiń sharshy metrin alty myń teńgege baǵalaıdy, 6 mıllıon teńge nesıe alý úshin birneshe baspana bolý kerek. Aýyldaǵy turǵyndarǵa 6 paıyzdyq nesıeni berý sharttaryn jeńildetip, baǵalaıtyn múlik qunyn joǵarylatýdy suraımyz», - dedi L. Qojahmetova.

Budan buryn habarlanǵandaı, keńes múshesi koronavırýstyń birinshi kezeńinde daǵdarys ortalyqtaryna júgingen áıel men bala kóbeıgenin aıtqan bolatyn.

Onyń sózine qaraǵanda, kópbalaly otbasylar tarapynan bıznes kýrstarǵa degen suranys kóp bolyp otyr.