Lázzat Qıynov: Senatta qyzmet jasaǵan zor qurmet
ASTANA. QazAqparat - Búgin Parlament Senatynyń jalpy otyrysynda burynǵy senator Lázzat Qıynov áriptesteri men Elbasyna alǵysyn aıtty , dep habarlaıdy QazAqparat.
«QR Prezıdentiniń Jarlyǵymen áriptesimiz Lázzat Ketebaıuly Qıynovtyń depýtattyq ókilettigi toqtatyldy. Lázzat Ketebaıulyn ózderińiz jaqsy bilesizder, uzaq jyldary munaı salasynda basshylyq qyzmetter atqardy. Elbasynyń senimine ıe bolyp, Mańǵystaý oblysynyń ákimi laýyzymynda óńirdiń áleýmettik-ekonomıkalyq damýyn qamtamasyz etý jolynda qajyrly eńbek etti. Parlament qabyrǵasynda Prezıdenttiń strategııalyq mindetterin tabysty oryndaýǵa qajetti zańnamalyq negizgi qalyptastyrýǵa qomaqty úlesin qosty. Zań jobalaryn tereń zerdelep, qoǵamnyń túıtkildi máseleleri jóninde mazmundy pikir, salmaqty oı aıtty. Sizdiń mol ómirlik tájirıbeńiz, salmaqty oı-pikirlerińiz ben tereń bilimińiz aldaǵy ýaqytta Qazaqstanǵa kerek bolatynyna senemiz», - dedi Parlament Senatynyń tóraǵasy Qasym-Jomart Toqaev.
Jalpy otyrys barysynda Lázzat Qıynov Senattyń «Qurmet gramotasymen» marapattaldy.
«Árbir qyzmettiń óz shegi bolady ǵoı. Mine, búgin sizdermen qyzmet jasaıtyn jolymnyń aıaqtalǵan kúni. Ómir jolymda túrli jumystardy atqardym jáne adal ári taza qyzmet etýge tyrystym. Al endi onyń qolymnan kelgenin nemese kelmegenin qyzmettes azamattar baǵalaı jatar. Osy ómir jolymda Senatta ózderińiz sekildi el azamattarymen qyzmet jasaǵanyma óte rızamyn», - dep atap ótti Lázzat Ketebaıuly.
Ol bul turǵyda jaqsy qarym-qatynastary úshin barsha senatorlarǵa alǵysyn bildirdi.
«Atap aıtqanda, Prezıdentimiz, Elbasymyz Nursultan Ábishuly Nazarbaevqa ózimniń úlken rahmetimdi aıtqym keledi. Men aýyldaǵy qarapaıym muǵalimderdiń balasymyn. Biraq úlken jetistikterge jetip, laýazymdy qyzmetterdi atqardym. Osynyń barlyǵy Elbasynyń arqasy», -dedi ol.
