Lázzat Qaltaeva: Jańa Konstıtýtsııa múmkindigi shekteýli jandardyń quqyǵyn qorǵaýdy kúsheıtedi

ASTANA. KAZINFORM — Konstıtýtsııalyq reforma jónindegi komıssııa otyrysynda QR Parlamenti Senaty janyndaǵy Inklıýzııa jónindegi keńestiń tóraǵasy Lázzat Qaltaeva jańa Konstıtýtsııa jobasy múmkindigi shekteýli adamdardyń quqyǵy men teń múmkindikterin qamtamasyz etýge baǵyttalǵanyn málimdedi.

Onyń aıtýynsha, Konstıtýtsııa adamdy jáne onyń quqyqtary men bostandyqtaryn eń basty qundylyq retinde moıyndaıdy. Jańa jobada kemsitýshiliktiń kez kelgen túrine jol bermeý qaǵıdaty saqtalǵan. Sonymen qatar, azamattardyń jasyna, densaýlyǵyna nemese múmkindigine baılanysty áleýmettik qorǵaý kepildikteri de naqty kórsetilgen.

— Qazaqstan Respýblıkasynyń Múmkindigi shekteýli adamdardyń quqyqtary týraly konventsııadan týyndaıtyn halyqaralyq mindettemeleri jańa Konstıtýtsııa qabyldanǵan jaǵdaıda da tolyq kólemde saqtalady, — dedi senator.

Lázzat Qaltaeva atap ótkendeı, Konstıtýtsııa jobasy tek quqyqtyq kepildikterdi bekitip qana qoımaı, múmkindigi shekteýli adamdardyń memlekettik basqarýǵa qatysýyn keńeıtýge de múmkindik beredi. Sonymen qatar mátinniń qoljetimdiligine erekshe mán berilgen: kórý qabileti buzylǵan azamattar úshin Braıl qarpimen, al zııatkerlik damýynda erekshelikteri bar adamdar úshin jeńil ári túsinikti tilde usynylýy kózdelgen.

— Osy sharalar jańa Konstıtýtsııanyń azamattar arasyndaǵy teńdikti qamtamasyz etýge, áleýmettik ádilettilikti nyǵaıtýǵa jáne múmkindigi shekteýli azamattardyń quqyqtaryn tolyq iske asyrýǵa qosymsha múmkindik beredi, — dedi Lázzat Qaltaeva.

Aıta keteıik, búgin Konstıtýtsııalyq reformalar jónindegi komıssııanyń toǵyzynshy otyrysy ótip jatyr.