Lázzat Qaltaeva Senat depýtaty retinde ant berdi
NUR-SULTAN. QazAqparat – QR Parlamenti Senatynyń depýtaty Lázzat Qaltaeva Qazaqstan halqy aldynda ant berip, palatanyń turaqty komıtetine saılandy, dep habarlaıdy QazAqparat tilshisi.
«Prezıdenttiń Jarlyǵymen qańtar aıynda Lázzat Moldabekqyzy Senat depýtaty bolyp taǵaıyndaldy. Múmkindigi shekteýli azamattyń Parlamenttiń depýtaty bolýy Táýelsiz elimizdiń tarıhynda alǵash ret oryn alyp otyr. Jalpy, Memleket basshysy bul sanattaǵy azamattardyń saıası ómirge belsene aralasýyna únemi basa mán berip keledi. Lázzat Moldabekqyzynyń senator bolýy sonyń naqty nátıjesi. Bul - Prezıdentimizdiń elimizdi jańartý baǵdarynyń iske asýynyń jarqyn kórinisi. Mundaı qadam aldaǵy ýaqytta múgedektigi bar adamdardyń saıası jáne qoǵamdyq ómirdegi belsendiligin arttyrýǵa yqpal etedi dep senemiz», - dedi Senat tóraǵasy Máýlen Áshimbaev palatanyń jalpy otyrysynda.
Osy oraıda ol L. Moldabekqyzyn kópshilik belsendi qoǵam qaıratkeri retinde jaqsy tanıtynyn eske saldy.
Senattyń búgingi jalpy otyrysynda L. Qaltaeva depýtat retinde ant berdi.
«Qazaqstan halqyna adal qyzmet etýge, Qazaqstan Respýblıkasynyń tutastyǵy men táýelsizdigin nyǵaıtýǵa, onyń Konstıtýtsııasy men zańdaryna qatań baǵynýǵa, depýtattyń ózime júktelgen mártebeli mindetterin adal atqarýǵa ant etemin», - dedi ol.
Sonymen qatar búgingi jalpy otyrysta L. Qaltaeva Senattyń Áleýmettik-mádenı damý jáne ǵylym komıtetiniń quramyna saılyndy.
Eske sala keteıik, bıyl qańtar aıynda Memleket basshysynyń Jarlyǵymen Lázzat Moldabekqyzy Qaltaeva Qazaqstan Respýblıkasy Parlamenti Senatynyń depýtaty bolyp taǵaıyndaldy.
