«Laıyqty baspana úshin» qozǵalysyna múshe úleskerlerdiń bas-basynda birneshe páterden bar - Astana ákiminiń eseptik kezdesýi

Bul týraly búgin Astana qalasy ákiminiń halyqpen ótken eseptik kezdesýi barysynda málim boldy. Imanǵalı Tasmaǵambetovke úlestik qatysýmen birneshe páterge aqshasyn salyp, aldanyp qalǵan azamatsha saýalyn joldap, nelikten oǵan tıesili páterlerdiń ornyna bir ǵana páter beriletindigine nalydy.

Óz kezeginde I.Tasmaǵambetov: «Elbasy ekonomıkanyń qıyn kezeńine qaramastan jaǵdaıǵa enip, qalamyzda turalap qalǵan qurylystardy aıaqtaýǵa qarajat bóldi. Jalpy alǵanda sońǵy úsh jylda 227 nysannyń qurylysyn aıaqtaýǵa 130 mlrd. teńge bólindi. Bul 1 mlrd.-qa jýyq AQSh dollary. Memleket qıyn jaǵdaıǵa túskenderge jáne bir ǵana baspanasy barlarǵa kómektesip jatqandyǵy túsinikti. Biraq eki jáne odan kóp páterlilerdiń problemasyn memleket sheshpeıtindigi áý-basta aıtyldy. Bizde «Laıyqty baspana úshin» qozǵalysynyń músheleri ashtyq jarııalaǵan bolatyn. Olar keıin jalpy jınalysta memlekettiń áleýmettik qoldaýyna muqtajdardyń tizimine engizildi. Olar birinshi kezekte memlekettiń esebinen qurylysy aıaqtalyp jatqan nysandardan 1 pátermen qamtamasyz etilýi tıis boldy. Olar tizimge turatyn jerleri bolmaǵan soń engizildi», - dedi ákim.

Biraq keıin anyqtalǵandaı, olardyń basym deninde Astana men ózge óńirlerde birneshe páterden bar bolyp shyqqan. I.Tasmaǵambetov qolynda bar málimetterge súıenip, olardyń birnesheýiniń aty-jónderin jarııa etti.

«Bastaryńyzǵa jaǵdaı túskende memleket sizderge kómektesetindigin, biraq bir ǵana páter beretindigin ashyp aıtty. Qalǵanyn aldap ketken adamdardan sot arqyly óndirip alyńyzdar. Sizder múldem baspanasyz qalar edińizder. Onyń ústine, bul iste alypsatarlar jeterlik bolyp shyqty», - dedi ol.