Laıyq emes sarbazdarǵa serjanttyq quramnyń shenderin berýdi toqtatý kerek - QR Qorǵanys mınıstri Á. Jaqsybekov
ASTANA. 23 mamyr. QazAqparat - Búgin QR Qorǵanys mınıstri Ádilbek Jaqsybekov serjanttardyń keńeıtilgen quramynyń Búkilarmııalyq keńesinde qatardaǵy sarbazdardy komandalyq laýazymǵa taǵaıyndaýdy jáne oǵan laıyq emes sarbazdarǵa serjanttyq quramnyń shenderin berýdi toqtatý kerektigin málim etti.
Onyń aıtýynsha, serjanttyq quramnyń jumysyn jetildirý úshin serjanttyq quram laýazymdaryn sapaly jáne joǵary jasaqtaýdy qamtamasyz etýge den qoıý qajet.
«Kishi komandırlerdiń kásibı biliktiligine áskerdiń jaýyngerlik daıarlyǵy táýeldi. Daıyn emes áskerı qyzmetshilerdi, qatardaǵy sarbazdardy komandalyq laýazymǵa taǵaıyndaýdy jáne berilýge tıisti emes tulǵalarǵa serjanttyq quramnyń shenderin berýdi boldyrmaý qajet. Mundaı tájirıbeni toqtatý kerek», - dep atap kórsetken mınıstr, serjanttyq korpýs eń aldymen ózderine, kásibı daıarlyq deńgeıine jáne áskerı tártipke kóńil bólýi tıistigin alǵa tartty.
«Kásibı serjanttyq korpýs TMD elderinde birinshi bolyp bizdiń elde quryldy. Sondyqtan sizderdiń oryndaryńyz erekshe. Búgin atalmysh keńes alǵash ret ótkizilip otyr. Sizder jeke qurammen jumys isteısizder. Armııada tártip pen jaýyngerlik daıarlyq deńgeıi, áskerde tehnıkalyq qarý-jaraqtyń jaǵdaıy sizderdiń jumystaryńyzǵa tikeleı baılanysty. Qazirgi tańda Qarýly Kúshter Joǵarǵy Qolbasshymyz N.Á.Nazarbaevtyń kómegi arqasynda bıik deńgeıge jetti», - deıdi Á. Jaqsybekov.
Serjanttardyń keńeıtilgen quramynyń Búkilarmııalyq keńesinde sońǵy jyldarda qordalanyp qalǵan máselelerdi sheshý joldary talqylandy. Búkilarmııalyq serjanttar keńesi áskerdegi osy tektes uıymdardyń ishindegi eń basty organy. Qazaqstan Qarýly Kúshterinde rotadan bastap, ártúrli býyndaǵy barlyǵy 915 serjanttar keńesi quramy bar.
