«Laı sý aǵyp tur»: Qyzylordada sýdyń túsi nege ózgerdi
QYZYLORDA. KAZINFORM — Instagram áleýmettik jelisiniń «Krıtıka Kyzylorda» paraqshasynda Qyzylorda qalasyndaǵy kópqabatty turǵyn úılerdiń birinen qatty laılanǵan sý aǵyp jatqany týraly beınejazba tarady.
Beınejazba avtory muny qalanyń Araı-3 shaǵyn aýdanyndaǵy jaǵdaı ekenin baıandaǵan.
— Sýdyń sapasy syn kótermeıdi. Osylaı aǵyp turǵanyna eki kún boldy. Ásirese senbi, jeksenbi kúnderi osylaı aǵady. Sýdyń sapasy qashan jaqsarady?, — dedi avtor.
Kemshiliktiń neden týyndaǵanyn «Qyzylorda sý júıesi» mekemesiniń qyzmetkerleri zerttep kórdi.
— 14 jeltoqsan kúni «Araı» sý alý qurylymynyń nasos qondyrǵylaryndaǵy elektr qýatynyń ýaqytsha ajyraýy jáne qaıta qosylýy saldarynan aýyzsýdyń túsi ózgergen. Elektr energııasynyń turaqsyzdyǵynan Araı-3 turǵyn aýdanyndaǵy № 77, 78, 79, 80 kópqabatty úılerdiń tuıyqtalǵan qubyryndaǵy shógindiler sý berý ýaqytsha toqtap, keıin qaıta iske qosylǵan ýaqytta kóterilip, sý laılanǵan. Shaǵym túsken kezden bastap Araı-2, Araı-3 turǵyn aýdandarynda aýyzsý qubyryn tazartý jumystary júrgizildi, — delingen kásiporyn taratqan resmı habarlamada.
Búginde mamandar joǵaryda kórsetilgen úılerge kireberis qubyrdy baqylaý qudyǵyna qosylǵan qubyrdan joǵary kóterý baǵytynda jumys atqaryp jatyr.
Buǵan deıin Almatyda Esentaı ózeniniń túsi ózgerip, tot túske aınaldy. Bul ózgeristi 28 tamyz kúni keshke qala turǵyndary baıqap, jelide jaza bastady.