Lavrov Sırııa qaqtyǵysyn retteýdegi Astana protsesine baǵa berdi
ASTANA. QazAqparat - Reseı Federatsııasynyń Syrtqy ister mınıstri Sergeı Lavrov Sırııadaǵy shıelenisti retke keltirýdegi Astana protsesiniń mańyzdylyǵyna baǵa berdi, dep habarlaıdy «QazAqparat» HAA tilshisi.
«Garant retinde tanylǵan úsh memleket pen uıymdastyrýshy el bolyp otyrǵan Qazaqstan, Sırııanyń oppozıtsııalyq tarapy, AQSh jáne Iordanııanyń baqylaýshylary bas qosqan bul formattaǵy protsestiń mańyzdylyǵy erekshe. Baqylaýshy elderdiń qatary arta berse bul da paıdasyz bolmas edi dep esepteımiz. Bul turǵyda talqylaýǵa qashan da ashyqpyz. Álbette, protseske qatysýshy elderdiń barlyǵynyń kelisimi bolýy kerek. Biraq bul protseske qatyspaı-aq kóptegen elder shıelenistiń sheshilýine úlesin qosyp keledi. Máselen, Sırııa eliniń oppozıtsııalyq qarýly kúshteriniń úkimetpen Astanada jumys atqara bastaǵany Jeneva protsesine áserin berdi», - deıdi RF Syrtqy ister mınıstri.
Sergeı Lavrovtyń aıtýynsha, Sırııadaǵy oppozıtsııalyq kúsh bertinge deıin úkimetpen betpe-bet jumys isteýden bas tartyp kelgen.
«Astana tikeleı dıalog mazmunyndaǵy formasymen Jeneva protsesine áserin tıgizdi. Sodan beri Saýd Arabııasy bizge kómektesip, eldegi oppozıtsııa toptaryn biriktirýdi qolǵa aldy. Bul baǵytta bizdiń mysyrlyq áriptesterimiz de birsypyra jumystardy atqaryp jatyr. Olar eki deeskalatsııa aýmaǵyn qamtý turǵysynan úlken septigin tıgizdi. Kaırdegi baılanystar bul aýmaqtardyń barlyq parametrleri boıynsha kelissózder jasaýǵa múmkindik berdi. Sondyqtan Astana protsesine qatyspasa da, birqatar elder ol onyń sátti aıaqtalýyna kómek qolyn sozyp jatyr», - deıdi Lavrov.
Aıta keterligi, búgin Astanaǵa saparmen kelgen Sergeı Lavrov qazaqstandyq áriptesimen kezdesip, birqatar kelisimderge keldi. Reseı SІM basshysy óz kezeginde QR jáne RF prezıdentteri kelesi aptada Sochıde kezdesýdi josparlap otyrǵanyn málim etken bolatyn.
