Lavrov: Reseı Ystanbulda ýkraınalyq tarapqa barlyq negizgi másele boıynsha memorandým usynýǵa daıyn
ASTANA. KAZINFORM – Reseı men Ýkraına delegatsııalarynyń 2 maýsymda Stambýlda ótetin kelesi kezdesýiniń múmkindigi týraly Túrkııanyń syrtqy ister mınıstri Hakan Fıdan men Reseı syrtqy ister mınıstri Sergeı Lavrov arasyndaǵy telefon arqyly sóılesýden keıin belgili boldy.
Reseı SІM basshysy Sergeı Lavrov Reseı tarapy barlyq negizgi másele boıynsha ustanymyn baıandaıtyn tıisti memorandým ázirlegenin jáne ony Stambýlda ýkraınalyq tarapqa tapsyrýǵa daıyn ekenin málimdedi.
Reseı delegatsııasyn RF prezıdentiniń kómekshisi Vladımır Medınskıı basqarady. Olar bul memorandýmdy Ýkraına delegatsııasyna tanystyryp, Stambýlda ótetin tikeleı kelissózderdiń ekinshi kezeńinde qajetti túsiniktemeler berýge daıyn.
– AQSh, Saýd Arabııasy jáne Túrkııanyń qoldaýymen Reseı men Ýkraına arasyndaǵy tikeleı kelissózderdi qaıta bastaýǵa jaǵdaı jasaldy. Qaıta jandandyrylǵan alǵashqy kezdesý 2025 jyldyń 16 mamyrynda Stambýlda ótti. Sol kelissózder nátıjesinde «1 000-ǵa 1 000» formaty boıynsha tutqyndar almasý júzege asty. Sondaı-aq Máskeý men Kıev turaqty beıbit retteýge qol jetkizý úshin ár taraptyń ustanymyn bildiretin qujattardy daıyndaýǵa kelisken bolatyn, - dedi Lavrov.
Reseı SІM resmı ókili Marııa Zaharova «60 mınýt» baǵdarlamasynda sóılegen sózinde Stambýldaǵy ekinshi kezeńge qatysatyn Reseı delegatsııasynyń quramy ózgermeıtinin habarlady.
RF Prezıdentiniń kómekshisi Vladımır Medınskıı sársenbi kúni Ýkraına Qorǵanys mınıstri Rýstem Ýmerovqa memorandýmdarmen almasý úshin naqty kún men oryndy usynǵanyn málimdedi. Ol sondaı-aq taraptar usynylǵan keshendi kelisimniń ár tarmaǵyn mazmundy talqylaýǵa daıyn ekenin jáne ýkraınalyq taraptyń rastaýyn kútip otyrǵanyn jetkizdi.
Marııa Zaharova Reseıdiń Kıevpen beıbit retteý jónindegi memorandým jobalarymen almasý barysynda basqa elderdiń kómegine júginý týraly kelisimder jasamaǵanyn da atap ótti.
Óz kezeginde, Ýkraına Qorǵanys mınıstri Rýstem Ýmerov áleýmettik jelidegi paraqshasynda qaqtyǵysty retteý jónindegi ýkraınalyq ustanymdy qamtıtyn memorandým jobasyn Reseı jaǵyna tapsyrǵanyn jazdy. Sondaı-aq ol Ýkraına tarapynan atysty tolyq ári sózsiz toqtatýǵa jáne dıplomatııalyq jumysty jalǵastyrýǵa daıyn ekenin rastady.
AQSh Prezıdentiniń arnaıy ókili Kıt Kellog telearnalardyń birine bergen suhbatynda Reseı men Ýkraına delegatsııalarynyń múmkin bolatyn kezdesýine oraı 2 maýsym kúni Stambýlda AQSh, Germanııa, Frantsııa jáne Ulybrıtanııa ókilderi de bolatynyn málimdedi.
25–27 mamyr aralyǵynda Túrkııa Syrtqy ister mınıstri Hakan Fıdan Máskeýge resmı saparmen baryp, Reseı prezıdenti V.Pýtın, prezıdent kómekshisi V.Medınskıı, SІM basshysy S.Lavrov jáne Syrtqy barlaý qyzmetiniń basshysy S.Naryshkınmen kezdesti. Sapar qorytyndysy boıynsha ol Reseıge resmı sapary barysynda atysty toqtatý úshin naqty negiz bola alatyn Túrkııanyń shynaıy parametrlerge qatysty kózqarasyn tanystyrǵanyn aıtty. Onyń sózinshe, Reseı men Ýkraınanyń atysty toqtatý rejımin júzege asyrý boıynsha talaptary ártúrli, jáne bul aıyrmashylyqtar áli de kelisýdi qajet etedi. Ankaranyń Ýkraına boıynsha belsendi dıplomatııalyq kúsh-jigeri Máskeý, Kıev, Vashıngton jáne Eýropa elderimen turaqty baılanystardy qamtıdy.
Buǵan deıin Ystanbulda Reseı men Ýkraına delegatsııalarynyń eki saǵatqa sozylǵan kezdesýi aıaqtalǵanyn jazǵan bolatynbyz.