Lavrov pen Rýbıo telefonmen tildesti

ASTANA. KAZINFORM – Reseı Syrtqy ister mınıstri Sergeı Lavrov pen AQSh-tyń memlekettik hatshysy Marko Rýbıo telefon arqyly tildesip, turaqty baılanys ornatýǵa, onyń ishinde RF prezıdenti Vladımır Pýtın men AQSh prezıdenti Donald Tramptyń kezdesýine daıyndalýǵa ýaǵdalasty. Bul jaıynda Kazinform TASS-qa silteme jasap habarlaıdy. 

— Turaqty baılanystar, onyń ishinde joǵary deńgeıdegi reseılik-amerıkalyq kezdesýge daıyndyq jaıy týraly ýaǵdalasty, - delingen reseılik syrtqy saıasat vedomstvosy taratqan aqparatta. 

Mınıstrliktiń atap ótýinshe, Lavrov pen Rýbıo «ózara tıimdi saýda-ekonomıkalyq jáne ınvestıtsııalyq yntymaqtastyq jolyndaǵy burynǵy ákimshilikten mura bolyp qalǵan birjaqty kedergilerdi alyp tastaý qalaýymen» reseılik-amerıkalyq qarym-qatynasta jınaqtalyp qalǵan problemalardy sheshý úshin baılanys arnalaryn qoldaý týraly kelisti.

— Taraptar halyqaralyq ózekti taqyryptar, onyń ishinde Ýkraına, Palestına, jalpy Taıaý Shyǵys tóńiregindegi jáne ózge de óńirlik baǵyttaǵy ahýaldy retteý boıynsha ózara is-qımylǵa baǵyttalǵan ekijaqty beıimdilikti belgiledi, - dep atap ótti vedomstvodan.

Sonymen qatar eki eldiń syrtqy saıasat vedomstvolarynyń basshylary 2016 jyly Barak Obama ákimshiliginen bastalǵan «AQSh-ta reseılik dıplomatııalyq mıssııanyń jumys isteý shartyn barynsha qatańdatý» áreketin jyldamyraq toqtatý joldary týraly pikir almasty. Dál osy jaıt reseılik taraptyń da qarymta sharalar qabyldaýyna túrtki bolǵan.

— Taıaý ýaqyttyń ishinde Reseı men AQSh-tyń sheteldegi ókildikteriniń jumysyna kedergilerdi ózara alyp tastaý boıynsha naqty qadamdardy kelisý úshin sarapshylar kezdesýin uıymdastyrý ýaǵdalastyǵyna qol jetkizildi, - dedi Reseı syrtqy ister mınıstrligi.

Buǵan deıin Reseı men AQSh prezıdenteriniń kezdesýi Saýd Arabııasynda ótetindigin jazǵan edik.