Lavrov Alıaska sammıtine qatysady

ASTANA.KAZINFORM — Reseı Syrtqy ister mınıstri Sergeı Lavrov 15 tamyzda Alıaskada ótetin Reseı-AQSh sammıtine qatysady, dep habarlaıdy TASS.

Bul týraly brıfıngte RF SІM Aqparat jáne baspasóz departamenti dırektorynyń orynbasary Alekseı Fadeev málimdedi.

— Ózderińiz biletindeı, ásirese aldyńǵy ákimshilikterdiń jumysy kezinde eki eldiń qarym-qatynasy aıtarlyqtaı tómendedi. Bul kezdesý kóshbasshylardyń ýkraınalyq daǵdarystan bastap, Halyqaralyq beıbitshilik pen turaqtylyqty qamtamasyz etý turǵysynan asa mańyzdy sanalatyn qalypty, fýnktsıonaldyq ekijaqty dıalogty qalyptastyrý jolyndaǵy kedergilerge deıingi barlyq qordalanǵan máselelerdi talqylaýǵa múmkindik berýi tıis, — dedi Fadeev.

Aıta keteıik, ótken aptada Tramp Pýtınmen kezdesý 15 tamyzda Alıaskada ótetinin málimdegen bolatyn. Memleket basshylary Ankorıdj qalasyndaǵy áskerı bazada kezdesedi.

Uıymdastyrýshylar úlken shtattaǵy kezdesýdi ótkizýge qolaıly nusqalary bar jalǵyz qala — Ankorıdj degen qorytyndyǵa keldi. Al bul tarıhı kezdesýdiń qaýipsizdik talaptaryna qalanyń soltústik shetinde ornalasqan Elmendorf-Rıchardson áskerı bazasy ǵana jaýap beredi.