«Laýra» daýyly saldarynan Tehas pen Lýızıanada jarty mln-nan astam adam kóshirilýde
NUR-SULTAN. QazAqparat – Amerıkanyń Tehas jáne Lýızıana shtattarynyń bıligi ázirge Meksıka shyǵanaǵynda bolyp jatqan «Laýra» daýylynyń jaqyndaýyna baılanysty jarty mıllıonnan astam jergilikti adamdy shuǵyl túrde qaýipsiz jerge kóshirýdi buıyrdy. Bul týraly QazAqparat Reuters agenttigine silteme jasap habarlaıdy.
Buıryq Tehas qalalaryndaǵy 420 myńnan astam turǵyny men kórshiles Lýızıanadaǵy taǵy 200 myń adamǵa qatysty bolyp otyr.
Seısenbi kúni «Laýra» daýyly tropıkalyq quıynǵa aınalǵan. Jeldiń jyldamdyǵy shamamen 33 m/s deıin kúsheıip, tipti odan da asyp barady.
AQSh-tyń daýyldardy baqylaý boıynsha Ulttyq ortalyǵynyń sońǵy baǵalaýynsha, «Laýra» Tehas pen Lýızıana jaǵalaýyna sársenbi kúni keshke jetedi.
