Laýazymdy tulǵalar bir qyzmetti 8 jyldan artyq atqara almaıdy

TÚRKІSTAN. QazAqparat - Budan bylaı laýazymdy tulǵalar bir qyzmetti segiz jyldan artyq atqara almaıdy. 2021 jyldyń 1 qańtarynan bastap qoldanysqa engiziletin qaǵıda talaptaryna saıası qyzmetshilerdiń de rotatsııasy engizilip otyr. Bul týraly búgin Óńirlik kommýnıkatsııalar qyzmetinde ótken brıfıngide QR Memlekettik qyzmet isteri agenttiginiń Túrkistan oblysy boıynsha departament basshysynyń orynbasary Erlan Ermahanbetov málim etti, dep habarlaıdy QazAqparat.

Onyń sózinshe, saıası jáne «A» korpýsynyń qyzmetshileri óz laýazymdaryna taǵaıyndalǵan kúninen bastap tórt jyldan keıin rotatsııalaýǵa jatady.
«Bul rette, ýákiletti adamnyń (organnyń) sheshimi boıynsha memlekettik saıası qyzmetshiniń atqaratyn laýazymynda bolý merzimi eki jylǵa uzartylýy múmkin. Odan ári osy memlekettik saıası qyzmetshiniń atqaratyn laýazymynda bolý merzimin QR Prezıdenti janyndaǵy Kadr saıasaty jónindegi ulttyq komıssııanyń sheshimimen taǵy eki jylǵa uzartýǵa jol beriledi. ıAǵnı, saıası jáne «A» korpýsynyń qyzmetshisi bir laýazymdy jalpy alǵanda segiz jyldan artyq atqara almaıdy. Aıta ketsem, qazirgi tańda Túrkistan oblysynda qyzmettegi 6603 memlekettik qyzmetshiniń 22-i saıası, 1 qyzmetshi «A» korpýsynyń qyzmetshisin quraıdy», – dedi E.Ermahanbetov.
Sondaı-aq, 1 qańtardan bastap ártúrli óńirde, respýblıkalyq mańyzy bar qalalarda jumys isteıtin oblys ákimdiginiń basqarma basshylaryn bir-biriniń ornyna taǵaıyndaýǵa ruqsat beriledi. Bul rette, «B» korpýsynyń qyzmetshisi óz laýazymyna taǵaıyndalǵan kúninen bastap úsh jyldan keıin rotatsııalanady. Keıin, qyzmetshiniń laýazymynda bolý merzimin Ulttyq komıssııanyń sheshimimen odan ári eki jylǵa uzartýǵa jol beriledi. Aıta keteriligi, QR Prezıdenti janyndaǵy Memlekettik basqarý akademııasy men «Bolashaq» baǵdarlamasy túlekteriniń sany ótken jyldyń osy kezeńimen salystyrǵanda 18% artqan.
Sondaı-aq, jıynǵa qatysqan QR Prezıdenti janyndaǵy Memlekettik basqarý akademııasynyń Túrkistan oblystyq fılıalynyń dırektory Janat Momynqulov memlekettik qyzmetshilerdiń biliktiligin arttyrý boıynsha atqarylǵan jumystardy baıandady.
«Bıyl Akademııanyń oblystyq fılıaly Túrkistan oblys ákimdigi jáne QR Memlekettik qyzmet isteri agenttigi departamentiniń qoldaýymen 1532 memlekettik qyzmetshini oqytty. Olar biliktilikterin arttyryp, qaıta daıarlaý kýrstarynan ótken», – dedi J.Momynqulov.